VOV4.K’ho- Cơldŭ lơh broă Chính phủ pa geh Jơnau yal ngai 07/11/2021 jơnau đơs pơndŭt bơh Phó Thủ tướng ồng Vũ Đức Đam dê tàm dơ̆ pơrjum pờ tơn tàm internet mờ ală càr tiah ring đah jum măt tơngai mŭt dà lơgar mờ Tây Nguyên bè broă lơh rơcăng sơndră kòp Covid-19.

Tơnơ̆ tŭ iăt jơnau yal bơh ală tiah dê, jơnau đơs bơh kuang đơng lam bồ Bộ Y tế, Bộ Kuang àng, Mpồl lơh broă dờng màng bơh Chính phủ dê mờ ală kuang bàng tus bal pơrjum dê, Phó Thủ tướng ồng Vũ Đức Đam sồr Bộ Y tế mhar lơh jăt tam pà, sồr bơyai lơh cĭt vaccine tàm ală càr, ƀòn dờng tiah ring đah jum dà lơgar mờ Tây Nguyên, pal cĭt tơl jơh ding dơ̆ dùl tàm pơgăp 05 ngai ai cau rlau 18 sơnam in; cĭt ding dơ̆ 2 di tŭ mờ tơl; cĭt ai kơnòm dềt bơh 12 tus 17 sơnam in. Bộ Y tế, Bộ Quốc phòng bơyai lơh ai mpồl cau dong kờl cĭt mhar ngan rlau jơh. Bộ Y tế bơto pơlam loh làng, ai tơl sơnơm nàng sơm kòp gờñ tơn bơh sơnrờp ală cau F0 nàng gơmù ƀà lơyah ngan rlau jơh bơta gơbàn kơn jơ̆ mờ chơ̆t să.

 Cau mblàng Lơ Mu K’Yến