VOV4.K’ho - Ngai do (26/10), ală kuang bàng Quốc hội geh cri bơyai bè rơndăp broă adăt tam gơl, bơtơl ờ uă bơta tàm adăt ngui gơnoar ngăc ngar. Jăt ală kuang bàng đơs: Do là rơndăp broă nền nòn, den tàng pal geh broă lơh di pal mờ ală jơnau hơ dunia mờ lơgar Việt Nam là lơgar tàm mpồl, gàr broă ring bal, ndrờm bal mờ ală adăt geh gơrềng geh Quốc hội tơlik tàm tơngai do.

Tàm Rơndăp broă Adăt tam gơl, bơtơl Adăt ngui gơnoar ngăc ngar dơ̆ do geh ai tơlik: di lah jơnau geh ală mpồl lơh broă, cau dùl nă să ngui nàng kŭp săp, kŭp rùp hơ̆ kờñ kă bro, mờ ờ dan cau tờm cih mờ kung gam pal tơm priă gơnoar cih cau tờm cih in. Geh ờ uă kuang bàng đơs là Rơndăp broă Adăt pal tam gơl jăt broă chồl pràn broă tam gơl pa, bơch lơh, rơcang, tus bal ngui ală cồng nha broă lơh mờ măi mŏk 4.0 bơh broă tơnguh broă lơh mờ lơh jăt gơnoar ngui bơta ngăc ngar, dong kờl broă lơh do ngai sơlơ rềp mờ mùl màl mờ bơta bè ờs dunia dê.

Cau mblàng Ndong Brawl