VOV4.K’ho- Ngai 29/6, ồng Phạm Minh Chính- Thủ tướng Chính phủ đơng lam dơ̆ pơrjum Chính phủ tơngume bơ̆t bơtàu kơrnoat boh lam nhai 6 nam 2021, jăt mờ hơ̆, lời dùl ngai nàng kờp sền, sền swì broă bơ̆t bơtàu mờ lơh jăt kơrnoat boh lam nàng kờñ sơrbac mhar tă bơsong ală kal ke, bơta gơkòl bè gùng dà, broă lơh kơrnoat boh lam drơng làng bol mờ mpồl lơh sa kă bro in niam rlau. Do là dùl tàm ală kơnòl broă tờm bơh Chính phủ dê.

Tàm dơ̆ pơrjum, ală cau ala măt neh cribơyai ring bal 8 tơngume: Rơndăp broă lơh Adat Kảnh sát ntrờn làm bă tiah; rơndăp lơh Adat tam gơl, bơtơl Tăp sèng- Măt broă jàu tơrgùm kờp dà lơgar bơh Adat Tơrgùm kờp dê; rơndăp lơh Adat tam gơl, bơtơl bàr pe bơta bơh Adat geh ngui bồ tơngoh jak; gùng dà tam gơl Adat Ù tiah; rơndăp cih Kơrnoat ala Kơrnoat 101 nam 2005 bơh Chính phủ dê bè bơ̆t bơtàu, lơh niam wơl hìu ơm bal; tă bơsong kal ke ai jơnau sồr crăp măy camera in; sền swì cồng nha bơ̆t bơtàu gùng dà broă lơh kơrnoat boh lam 6 nhai bồ nam mờ gùng dà, kơnòl broă ală nhai lồi nam.

Dùl tàm ală tơngume pal sền ngăc ngan tàm dơ̆ pơrjum là rơndăp cih Kơrnoat bơh Chính phủ dê bè broă dong kờl cau lơh broă, cau ngui cau lơh broă mờ ală cau tìp kal ke tài bơh kòp dờng Covid-19 bal mờ kờp jơh priă pơgăp 26 rbô tơmàn đong. Bè tơngume do, ồng Phạm Minh Chính sồr kơlôi sơnơng, kờp sền nàng kờñ broă dong kờl tus jơh geh mờ ală cau kờñ dong kờl, tàm hơ̆ bơtơl tai cau dong kờl là cau lơh broă khăt gơboh is.

Cau mblàng Lơ Mu K’Yến