VOV4.K’ho- Drim do 18/6, tàm Hà Nội, Bộ Nông nghiệp mờ Phát triển Nông thôn mờ Bộ Thông tin mờ Truyền thông đơng lam bal dơ̆ pơrjum pờ tơlik tơn tàm internet gùt lơgar bè “Tam gơl sồ tàm gah lơh broă sa sươn sre mờ bơtàu tơnguh ƀòn lơgar”.

Jăt Kơrnoat bơh Thủ tướng Chính phủ dê bè Broă lơh Tam gơl sồ dà lơgar tus nam 2025, pơlam gùng dà tus nam 2030, tam gơl sồ tàm lơh broă sa sươn sre nàng kờñ lơh gơlik geh anih, ală mpồl lơh broă sồ lơh broă sa sươn sre lơh bơnàng jă, bơceh lơh gùng dà broă lơh kơrnoat boh lam, dong kờl lơh tam gơl bơh “Lơh broă sa sươn sre” tus “Lơh sa sươn sre”; bơtàu tơnguh rài lơh broă sa sươn sre công nghệ cao jăt gùng dà sền dờng màng lơh broă sa sươn sre ngac ngar, lơh broă sa sươn sre dipal, tơnguh khà phan lơh geh bơh lơh broă sa sươn sre ngui công nghệ sồ tàm rài lơh sa.

Jăt Broă lơh Tam gơl sồ dà lơgar bơh Việt Nam dê, lơh broă sa sươn sre geh sền là dùl tàm phàm gah broă lơh ai lơh lài tam gơl sồ. Nàng tam gơl sồ gơtùi tàm gah lơh broă sa sươn sre, pal ngui công nghệ cao tàm tơl bơnah broă lơh gơlik phan, lơh gơs phan kă bro, prăp gàr, jun pơndiang mờ kă bro.

 Cau mblàng Lơ Mu K’Yến