VOV4.K’ho - Xã Văn Lem, kơnhoàl Đăk Tô là xã gơwèt kal ke ngan càr Kon Tum dê, gùt xã geh mờr 2 rơbô 900 nă làng bol, tàm hơ̆ làng bol kòn cau geh 98% khà kờp làng bol. Lơh jăt broă lơh oh mi jăt nùs nhơm Nghị quyết sồ 04 bơh Tỉnh ủy Kon Tum dê, 5 nam do, bal mờ broă dong kờl xã lơh oh mi atbồ, sền gàr mờ tơnguh bơtàu brê, Kes priă sền gàr mờ tơnguh bơtàu brê càr Kon Tum kung neh pơgồp bal nền nòn mờ Đảng ủy, gơnoar atbồ bal mờ ală mpồl lơh broă tàm xã lơh gơs ală tam gơl uă ngan tàm broă tơnguh bơtàu lơh sa mpồl bơtiàn, gàr niam bơta lơngăp lơngai ờ do ờ dă mờ tơnguh rài kis làng bol.

Ùr bơklao bi A Vinh mờ lŏ Y Vân kis tàm ƀòn Đăk Xanh, xã Văn Lem, kơnhoàl Đăk Tô geh tus 8 nă kòn. Tài gal kòn, jơh ală priă geh tàm rài kis mìng kơnờm tàm bă ù tam bùm ƀlàng, kòi den tàng hìu nhă gơtìp jơgloh pah nam. Nam 2018 là dùl tàm 5 hìu geh Kes priă sền gàr mờ tơnguh bơtàu brê càr Kon Tum rơwah nàng bơ̆t bơtàu broă “Dong kờl, bơto sồr hìu nhă ròng jơrke deh kòn” tơnguh bơtàu broă lơh sa. Geh Kes priă dong kờl 2 nơm jơrke, 1 nơm dam bal mờ broă bơto tàm broă ròng, priă blơi phan lơh wàng, phan sa lài ngan, tus tŭ do mpồl jơrke hìu nhă bi A Vinh sùm geh git nđờ jơ̆t nơm. Tŭ do den mpồl jơrke neh là broă lơh geh priă kuơ màng hìu nhă dê. Lơh ngan ai jơrke in sa, bi A Vinh chờ hờp pà git bè broă ròng jơrke hìu nhă bi dê: "Lài do tŭ ờ hềt geh jàl den sreh gle, sreh đơr hơ̆ sồng tàñ gùt dar. Tŭ lài ngan ai jơrke in sa kơnuh bùm blàng mờ trao trŭ sin hơ̆ sồng ai jơrke in sa bal mờ lơ̆. Kung jŏ jŏ añ tăc nàng geh priă blơi boh, blơi ƀòk ngòt bè hơ̆ gơdê".

Bơh ală broă lơh geh Kes priă sền gàr mờ tơnguh bơtàu brê càr Kon Tum bơ̆t bơtàu tàm xã lơh oh mi Văn Lem bè: "Bơsram mờ lơh jăt ơnà jăk, nùs nhơm niam, broă lơh Hồ Chí Minh dê"; "Dong kờl, bơto sồr hìu nhă ròng jơrhe deh kòn”, “Bơto sồr, dong kờl broă tam mờ sền gàr tờm kơphe”... neh dong kờl làng bol tàm xã tam gơl bồ tơngoh kơlôi sơnơng, broă lơh nàng brồ guh klàs mờ rơƀah. Tus tŭ do, ală broă lơh geh Kes priă bơ̆t bơtàu neh geh tus jơh ală ƀòn, geh uă hìu nhă bơsram mờ đờm jăt bal. Geh uă hìu lài do gơtìp geh bal tàm khà măt “rơƀah sùm” tŭ do neh geh priă mờ klàs mờ jơgloh rơƀah. Ồng A Hùng, Chủ tịch UBND xã Văn Lem pà git: "Tơngai do kes priă sền gàr mờ tơnguh bơtàu brê neh pơgồp bal nền nòn mờ gơnoar atbồ xã tàm broă atbồ sền gàr brê kung bè là sền gròi, dong kờl làng bol tàm xã Văn Lem bè broă tơnguh bơtàu broă lơh sa mpồl bơtiàn. Kes priă sền gàr mờ tơnguh bơtàu brê dong kờl làng bol tơn jơh jơgoh, tơmù rơƀah kung bè ring niam rài kis bơh làng bol dê. Kes priă sền gàr mờ tơnguh bơtàu brê Kon Tum ai xã in bè broă tơn jơh jơgloh tơmù rơƀah kung bè rài kis broă lơh sa mpồl bơtiàn".

Jăt jơnau kờp bơh Kes priă sền gàr mờ tơnguh bơtàu brê càr Kon Tum pà gŏ, tàm 5 nam lơh jăt broă lơh oh mi bal, bơ̆t bơtàu xã kal ke Văn Lem, Kes priă do neh lơh jăt niam broă rài kis lơh sa mpồl bơtiàn mờ kờp jơh khà priă dong kờl git nđờ rơhiang tơlăk đong. Geh pơnrơ ngan là ală broă lơh geh Chi bộ mờ Chi đoàn bơh Kes priă lam sồr, bè broă lơh kis git jơnau git adăt, drơng gàr cau rơƀah, kơnòm dềt, kơnòm bơsram geh rài kis kal ke; pah nam dong kờl xã bơyai lơh ngai chờ klơm mbar tơlir... Đơs bè broă lơh oh mi, bơ̆t bơtàu xã Văn Lem bơh priă priă sền gàr mờ tơnguh bơtàu brê càr Kon Tum, ồng Lê Trọng Thọ, Bí thư Đảng ủy xã pà git: “Kes priă sền gàr mờ tơnguh bơtàu brê neh sùm sền gròi pơgồp bal mờ Đảng ủy xã Văn Lem bơyai lơh, lơh jăt ală kơnòl bè broă tơnguh bơtàu lơh sa mpồl bơtiàn, sền gàr bơta lơngăp lơngai dà lơgar kung bè bơ̆t bơtàu mpồl lơh broă chính trị tàm xã. Kes priă sùm sền gròi tơn bơh bồ nam pơgồp bal mờ xã bơ̆t bơtàu rơndăp broă lơh di pal mờ bơta mùl màl bơh xã dê. Jăt tơngai pah nhai, pah quý tam pà bal kuang bàng tus pơgồp bal nàng sền bè cồng nha lơh jăt ală kơnòl. Tàm broă lơh jăt geh ală kal ke lơi den mpồl dong kờl bơsong ha là yal tus mờ ală cấp geh gơnoar in”.

Tơnơ̆ mờ 5 nam lơh oh mi, lơh broă bal mờ Đảng ủy, gơnoar atbồ, ală mpồl lơh broă bal mờ làng bol xã Văn Lem, Kes priă sền gàr mờ tơnguh bơtàu brê càr Kon Tum neh geh ală broă pơgồp bal kuơ màng gơwèt mờ broă tơnguh bơtàu bal xã dê. Bơh dùl xã gơwèt kal ke, làng bol kòn cau geh tus 98% khà kờp làng bol, tus tŭ do Văn Lem neh tơmù geh khà hìu rơ[ah gam 19,57%. Xã kung neh geh 14 tàm 19 khà broă tàm broă bơ̆t bơtàu ƀòn lơgar pa.

Cau cih Khoa Điềm-Cau mblàng Ndong Brawl