VOV4.K’ho- Jat jơnau sồr bơh Bộ Y tế dê, Công ty Cổ phần vaccine Việt Nam (VNVC) pa jàu 1 tơlak 113 rơbô 400 ding vaccine AstraZeneca ai Viện Pasteur ƀòn dờng Hồ Chí Minh in tam pà ai ală càr, ƀòn dờng tiah đah Jum dà lơgar, di tŭ dong kờl nàng cĭt sơnơm vaccine rcang sơndră kòp Covid-19 ai làng bol in.

Dơ̆ tàm jàu rlau 1 tơlak 100 rơbô ding vaccine do geh kuơ dờng màng ngan tềng đap tơngai kòp Covid-19 bơtờp uă ngan, jơnau kờñ cĭt sơnơm vaccine bơh tơl nă làng bol dê gơguh uă ngan rlau jơh, ngan là tàm tiah kòp tờm bè ƀòn dờng Hồ Chí Minh, Bình Dương... Broă cĭt vaccine rcang sơndră kòp rcang lài, lơh geh bơta pràn sơndră kòp tàm mpồl bơtiàn gờñ geh dong ală càr tiah đah Jum dà lơgar dê đơs bal gùt lơgar đơs is tơrmù ƀà bơta hat hal ir tàm hìu sơnơm, tơrmù ƀà khà cau chơ̆t. Kờp tus ngai 15/8, Việt Nam neh dờp geh pơgap 21 tơlak 500 rơbô ding vaccine ală bơta. Ƀòn dờng Hồ Chí Minh mờ ală tiah neh cĭt mờr 14 tơlak 700 rơbô ding vaccine rcang sơndră kòp Covid-19, tàm hơ̆ geh mờr 1 tơlak 400 rơbô nă cau geh cĭt tơl 2 ding.

Cau mblàng K’Hạnh