VOV4.K’ho- Đoàn Ơruh pơnu Cộng sản Hồ Chí Minh, Mpồl tam klac ơruh pơnu Việt Nam pa sơn đờm lam lơh broă lơh dong kờl khà priă tac phan ngui sa pal geh pah ngai ai ơruh pơnu công nhân mờ làng bol in geh sơn đan “”Tam pà bal bơta kờñ gơboh, sơm bat tê bal sơrlèt gan kòp dờng””. Do là broă lơh lơh jat jơnau hòi jà bơh Thủ tướng Chính phủ dê tàm broă at tê bal, pơgồp bơta pràn, ai tơnggŏ nùs nhơm tàm kờñ gơboh bal kòn bơnus, tàm dong kờl bal ơruh pơnu công nhân mờ ală hìu bơnhă gam gơtìp kal ke tài gơ rềng kơn jơ̆ kơn jut bơh kòp dờng Covid-19.  

Broă lơh geh sơn đờm lam lơh bơh ngai 15/7/2021 tus ngai 30/6/2022. Mùl màl tŭ blơi ală phan pal geh pah ngai bơh App blơi phan MEGA1 halà bơh ală anih tac phan tàm bă tiah bơh broă lơh dê, ơruh pơnu công nhân, làng bol geh ală mpồl lơh sa kă bro, gah lơh gơlik phan tus bal broă lơh tơrmù priă tac bơh 50% khà priă phan blơi.

Tŭ do, broă lơh geh bơta dong kờl, lòt bal bơh uă mpồl lơh sa kă bro tàm lơgar dê. Ồng Nguyễn Ảnh Nhượng Tống - Chủ tịch Hội đồng quản trị Công ty Cổ phần Tập đoàn Yeah1, là mpồl pơgồp bal lam lơh pà git, tŭ do, broă lơh gam tac ală bơta phan ngui sa pal geh pah ngai bè phe, dà toh, dà màn, dà tuơng, tơngi,... Bơdìh hơ̆ tai, kờñ at tê bal mờ ală mpồl đoàn, mpồl lơh sa kă bro, cau dùl nă să geh jơnau kờñ bơyai lơh ală broă lơh mờ jơnau kờñ dong kờl làng bol geh rài kis kal ke tài bơh kòp Covid-19. Kong ti Cổ phần Tập đoàn Yeah1 kung neh lơh broă tơn mờ ală mpồl lơh gơlik phan blơi wơl ală bơta phan mờ khà priă tac sơn đờm lơh gơlik, bơh hơ̆ gơtùi tơrmù khà priă tac ai làng bol in: “Bol hi geh bơceh ală combo nàng lơh bè lơi cau ngui sa pah ngai mìng pal tă rlau bơh 100 tus 200 rbô đông là gơtùi kơlôi rơcang phan ngui sa pah ngai, bol hi kung ai tơlik ală khà nàng cau ngui sa gơtùi  blơi 1 combo dùl nhai, Tŭ do, pràn jak lơh gơlik phan tàm nhai do ai tơlik pơgap ờ hềt tus 50 rbô cơmbo, jơnau kờñ nhai tơ nơ̆ geh gơguh tus 200 rbô combo, ngai sơlơ gơguh uă rlau”.

Ồng Nguyễn Ngọc Dũng, Phó Chủ tịch Hiệp hội kă bro điện tử Việt Nam pà git, Hiệp hội geh lòt bal mờ broă lơh, mờ broă tơrgùm ală anih kă bro điện tử dờng tàm lơgar mờ ală mpồl lơh sa kă bro tàm gah jun phan geh dong kờl jun phan tus cau ngui sa in: “Bal mờ broă Hiệp hội điển tử dong kờl broă lơh jun phan tus cau ngui sa dùl bă mhar ngan rlau jơh, tŭ do, mpồl bơyai lơh kung gam tơrgùm jơh ală oh mi nàng lơh bè lơi lơh gơlik mpồl sền sơ wì bơta niam phan bơna, hơ pơrgon bè khà priă nàng pơyua tơl nă cau in, ờ geh bơta gơ lin bè bơta niam halà lời làng bol sơ nơng là tơnguh khà priă lir hơ̆ sồng tơrmù khà priă lơyah rlau”.

Bi Ngô Văn Cương, Bí thư Đoàn dà lơgar đơs tàm broă lơh

Lam lơh tàm 63 càr, ƀòn dờng tàm gùt lơgar, mơya broă lơh lam lơh lài tàm ală càr, ƀòn dờng gam geh broă gơlik geh kal ke bơh kòp Covid-19 dê. Mùl màl, tàm ală nhai 7, 8, 9, broă lơh tac ai ƀòn dờng Hồ Chí Minh, càr Bình Duơng mờ ală càr rềp bal in. Ù tiah tac phan geh rề ơnàng rlau tàm ală nhai pơn jat tai jat tàm broă gơlik geh ngan ngồn.

Lài hơ̆, nàng dong làng bol lơh broă sa tac phan lơh gơs bơh suơn sre, jai kong mờ broă gơlik geh bơh kòp Covid-19 dê, Đoàn Ơruh pơnu Cộng sản Hồ Chí Minh dà lơgar neh bơyai lơh broă lơh “”Tơrbŏ phan lơh gơs bơh suơn sre- Tam pà bal bơta kờñ gơboh- sơm bat tê bal sơrlèt gan kòp dờng”. Ală mpồl lơh sa kă bro, mpồl lơh broă neh hơ pơrgon at tê bal gàr kơ̆ kơljap rài kis, dong kờl cau lơh broă sa sơrlèt gan kòp dờng Covid-19 mờ kung lam lơh geh cồng nha dơ̆ lam sồr “Cau Việt Nam ngui lài phan Việt Nam”.

Jat Bí thư dơ̆ 1 Đoàn Cộng sản Hồ Chí Minh dà lơgar bi Nguyễn Anh Tuấn đơs, mờ broă tơrbŏ bal phan lơh gơs bơh suơn sre bơh ròt ală anih tac phan tơn mờ tac pờ tơn tàm internet, Đoàn ơruh pơnu pơgồp bal mờ ală Bộ, mpồl lơh broă chính trị mpồl bơtìan ngui bơta pràn bơh anih lơh broă dê, ngui bơta ƀuơn bơh broă tam gơl số dê nàng dong tac phan lơh gơs bơh suơn sre geh cồng nha ngan rlau jơh ai làng bol in tàm tơngai kòp bơ tờp gơlik geh kal ke do: “”Bol hi kơp kờñ là, nùs nhơm bơceh pa, lơh broă dong kờl is do geh pơn jat tai geh tơnguh tàm tơngai tus, ờ mìng tơrbŏ phan lơh gơs bơh suơn sre, tam pà bal bơta kờñ gơboh, at tê bal sơrlèt gan kòp dờng mờ gam pơgồp bơnah bal mờ Bộ Nông nghiệp mờ phát triển nông thôn lam lơh geh cồng nha kơ nòl broă tam gơl mờ bơtàu tơnguh lơh sa suơn sre tàm tŭ tơngai pa”.  

Mờ kơ nòl tam pà ƀà bơta ơnòng kơn jơ̆ bal mờ git nđờ tơlak hìu bơnhă Việt Nam bơh broă dong kờl khà priă phan ngui sa pal geh pah ngai, broă lơh kung pơgồp bơnah lam lơh jat jơnau kờñ dơ̆ lĕ bal, ờ mìng sơndră kòp bơ tờp geh cồng nha, mờ gam gàr bè ờs, bơtàu tơnguh lơh sa kă bro bơh broă dong kờl git nđờ tơlak nă cau lơh broă, công nhân tàm ală hìu măi, xí nghiệp lơh gơlik ală bơta phan ngui sa pal geh pah ngai geh gàr sùm broă lơh, tơrmù ƀà jơnau pơhìn roh broă lơh tài gơ rềng bơh kòp Covid-19, dờng rlau là pơgồp bơnah bơtàu tơnguh rài lơh sa phan ngui sa.

Cau mblàng K'Duẩn