VOV4.K’ho- Bal mờ bơhiàn tam klăc bal, tàm dong tàm ròng tàm kờñ gơboh bal bơh jơi bơtiàn dê, tơnơ̆ jơnau hòi jà bơh Chủ tịch lơgar mờ Mpồl Chủ tịch Ủy ban Mặt trận dà lơgar Việt Nam dê tơn, uă anih lơh broă, ală tiah, ală mpồl cau, cau dùl nă să is neh lơh niam kơnòl broă, gơ jăt tàm bơta geh mờ bơta tơl pràn bơh he dê, tus bal tă pơgồp dong kờl Kes priă rơcăng sơndră kòp Covid-19. Do là bơta pràn dờng ngan nàng bal mờ Chính phủ dong kờl ai mpồl cau lơh sơnơm, y sĩ, bác sĩ, ală cau să tờm tơn lơh broă lơh sơm kòp, lơh broă tàm ală tiah ơm yah ngài kung bè lơh geh priă jền bơyai lơh cĭt vaccine ai làng bol tàm gùt lơgar in.

Cơldŭ wă rò ală “nùs nhơm niam” dong kờl rơcăng sơndră kòp Covid-19 tàm Ủy ban Mặt trận dà lơgar Việt Nam ală ngai do sùm pờ mpồng wă rò ală mpồl cau, cau dùl nă să is, ală mpồl lơh sa kă bro, cau geh nùs nhơm niam tus tàm sơm băt tê bal bal mờ Chính phủ rơcăng sơndră kòp Covid-19.

Cèng priă jền 131 tơlak đong bơh Ală mpồl cau làng bol Việt Nam dê tàm Ma Cao, lơgar Lo rê hờ lơgar dong kờl rơcăng sơndră kòp Covid-19, mò Nguyễn Thị Hương đơs là, làng bol ơm tàm lơgar ndai sùm jăt sền broă gơbàn bơh kòp bơtờp tàm lơgar, kơ̆p kờñ ală tă pơgồp tus mờ mpồl cau lơh sơnơm, y sĩ, bác sĩ, ală cau să tờm tơn lơh broă lơh sơm kòp, nàng pơgồp bơnah kơryan kòp Covid-19. Mò Nguyễn Thị Hương, đơs: Bol añ neh pơgồp bal mờ Tổng lãnh sự quán Việt Nam mờ Ală mpồl cau Việt Nam tàm Ma Cao nàng bơyai lơh ală dơ̆ pơrjum cribơyai tơrgùm wơl ală làng bol mờ hòi jà bal. Làng bol kung dùl nùs ngan bal, tài bơh là jơi bơtiàn pròc mhàm bal bơh mò pàng he dê, lòt tus tiah lơi den kung là kah ngan sơl hờ  ƀòn lơgar. Den tàng bè hơ̆, bol añ neh hòi jà mờ geh cồng nha ngan.

Lơh jăt jơnau hòi jà bơh ồng Nguyễn Xuân Phúc- Chủ tịch lơgar dê, “dà lơgar kờñ ngan bơta rơcăng lài tàm sơm băt tê bal tă pơgồp bal pràn bơh tơl nă làng bol dê”. Ală ngai do, uă anih lơh broă, uă tiah neh hòi jà công chức, viên chức, tơl nă cau dùl ngai priă nhai dong kờl rơcăng sơndră kòp. Tàm Bộ Nội vụ, tơnơ̆ tŭ lam lơh tơn neh dờp geh priă jền rlau 430 tơlak đong, jơh ală priă jền do neh geh pơyua tus Kes priă Rơcăng sơndră kòp Covid-19 nàng pơgồp bal pràn lơh jăt ală broă lơh tam dră mờ kòp. Ồng Vũ Đăng Minh- Kuang ătbồ Cơldŭ lơh broă Bộ Nội vụ, pà gĭt: 100% kuang bàng, công chức bơh Bộ Nội vụ dê neh dùl ròt lơh jăt dơ̆ hòi jà. Kuang bàng, công chức Bộ Nội vụ kơ̆p kờñ bol he geh broă lơh rơcăng sơndră kòp niam ngan rlau jơh nàng gròi sền niam bơta gơlik geh. Lơh bè lơi kơryan kòp gờñ bè ờs wơl rài kis nàng bơtàu tơnguh dà lơgar. Mơya, kuơmàng priă jền bulah dềt rơhền ngan mơya lài ngan sền gròi, priă jền dong kờl di tŭ ai kuang bàng, cau lơh sơnơm tàm tiah lam lài tam dră mờ kòp in. Tài bơh trồ tơngai duh ir den tàng oh mi bòl glar ngan.

Jàu priă jền 300 tơlak đong dong kờl bơh Ủy ban Mặt trận dà lơgar Việt Nam dê, ồng Vũ Hải Quang- Phó Kuang ătbồ dờng Anih Jơnau đơs Việt Nam dê pà gĭt, tơl nă kuang bàng, công chức, viên chức, cau sền swì jơnau, cau chài đơs crih tam ya, cau bơceh jơnau đơs crih bơh Anih Jơnau đơs Việt Nam dê dong kờl priă jền 300 tơlak đong bal mờ bơta kơ̆p kờñ tă pơgồp tai bơta pràn nàng bal mờ Đảng, Dà lơgar, Chính phủ kơryan bơta lơh bơtờp bơh kòp dê tàm mpồl bơtiàn. Bal mờ broă tă pơgồp, tơngai lài, Anih Jơnau đơs Việt Nam neh jơh nùs mblàng yal rơcăng sơndră kòp. Ồng Vũ Hải Quang, đơs: Mờ gơnoar broă là dùl anih lơh broă mblàng yal jơnau dờng bơh Đảng, bơh Chính phủ dê, bol añ kung lời tŭ jơ uă ngan nàng yal tơngĭt jơnau mờ ală broă lơh tàm broă rơcăng sơndră kòp Covid-19. Sùm sồr cau cih băo tus lơh broă tàm tiah geh kòp, mblàng yal ală cồng nha lơh geh tàm broă sồr lơh bơh Đảng, mờ bơh Chính phủ dê. Broă lơh jăt jơnau kờñ dơ̆ lĕ bal tam dră mờ kòp mơkung bơtàu tơnguh lơh sa sơl; jờng rơ krơh niam kung bè ală mpồl cau lơh broă tàm tiah lam lài tam dră mờ kòp bòl glar kal ke ngan mờ geh bal bơta phi să sơl.   

Ală tŭ kal ke ngan rlau jơh là tŭ nàng tơl nă làng bol tơngŏ nùs nhơm tam klăc bal, lơh broă bal mờ geh kơnòl tài dà lơgar, tài làng bol. Uă mpồl lơh sa kă bro mờ cau dùl nă să is neh tơnguh uă nùs nhơm tam klăc bal, tàm dong tàm ròng tàm kờñ gơboh bal “sơnđàc cau bè sơnđàc să tờm he sơl”, “nha ngan glòm nha sèt”. Ala măt ală mpồl lơh sa kă bro, ngân hàng mờ cau dùl nă să is, đơs: “Jăt añ kơlôi, den bơta dong kờl is, hơ̆ là bơh nùs nhơm. Bơh nùs nhơm neh gơ mŭt jrô tàm bồ tơngoh bơh tơl nă làng bol Việt Nam dê. Kơnòl den bơdìh mờ bơta lơh is, dong kờl is, ală cau sền gŏ kơnòl pal tàm sơm băt tê bal bal mờ Chính phủ, bal mờ mpồl bơtiàn.

Đơs nền geh ngui di broă, loh làng, song dơ pă, ờ ndơ̆p mpồn mờ geh cồng nha priă jền mờ mpồl lơh sa kă bro bal mờ cau geh nùs nhơm niam dong kờl Kes priă rơcăng sơndră kòp Covid-19, mò Trương Thị Ngọc Ánh- Phó Chủ tịch Ủy ban Mặt trận dà lơgar Việt Nam pà gĭt: Do là dùl bơta pràn dờng ngan nàng blơi vaccine cĭt ai làng bol tàm gùt lơgar in, nàng dong kờl mpồl cau lơh sơnơm, ală y sĩ, bác sĩ, ală cau să tờm tơn lơh broă lơh sơm kòp halà lơh broă tàm ală tiah ơm yah ngài kung bè lơh geh priă jền dong kờl blơi măy mok, phan bơna sơnơm tơm ba drơng ai broă lơh rơcăng sơndră kòp Covid-19 in. Mò Trương Thị Ngọc Ánh, đơs: Gơwèt mờ priă jền hòi jà tă pơgồp geh bơh Dà lơgar, bol añ pơgồp bal mờ Mpồl đơng lam dà lơgar rơcăng sơndră kòp Covid-19 nàng sền gàr broă lơh ătbồ, ngui priă jền dong kờl bơh ală mpồl lơh sa kă bro, ală cau geh nùs nhơm niam, sền gàr di jơnau kờñ, pal ngui geh cồng nha priă jền hòi jà tă pơgồp geh.

“Bơta pràn bơh tam klăc bal, dùl nùs bal, jơh gùt làng bol tam dră mờ kòp dê”- ală mpồl cau ala măt ai mpồl lơh sa kă bro, mpồl cau, cau dùl nă să is tus dong kờl tàm Ủy ban Mặt trận dà lơgar Việt Nam ală ngai do là cơng tàng tơngŏ loh làng do ờ mìng là dùl jơnau đơs mờ bơr lơm mờ là dùl mpồl cau ngan ngồn tơngŏ duh hồl bè nùs nhơm tam klăc, dùl bơhiàn kuơmàng bơh jơi bơtiàn dê. Nùs nhơm hơ̆ sơlơ tàm tŭ kal ke den sơlơ mpờl gŏ tai nùs nhơm mờ bồ tơngoh kòn bơnus Việt Nam dê.

            Cau cih Lại Hoa- Cau mblàng Lơ Mu K’Yến