VOV4.K’ho- Drim do (23/10), tàm Hà Nội geh lơh cribơyai pờ tơn tàm internet “Tam pà jơnau tơnggit, tơrbŏ bal kă bro phan lơh gơs bơh suơn sre, brê bơnơm, phan tàm dà đah Hà Nội mờ ală càr, ƀòn dờng”. Cribơyai là pơrjum dơ̆ 8 bơh Mpồl đơng lam Cribơyai tàm tơrbŏ tac phan lơh gơs bơh suơn sre 970 gơwèt Mpồl đơng lam Bơtàu tơnguh drà kă bro phan lơh gơs bơh suơn sre, Bộ Nông nghiệp mờ Phát triển Nông thôn bơyai lơh.

Tàm dơ̆ cribơyai, ală kuang bàng geh yal bè broă dong kờl ală tiah, mpồl lơh sa kă bro, hợp tác xã, cau lơh broă sa tàm tơrbŏ bal lơh gơlik, tac phan lơh gơs bơh suơn sre tàm drà kă bro tàm lơgar mờ tac hờ lơgar ndai, chồl pràn bơtàu tơnguh ală ròt mpồl lơh bal phan lơh gơs bơh suơn sre kơ̆ kơljap, tơnguh bơta kuơ phan lơh gơs mờ priă lơh geh ai cau lơh broă sa in. Do gam là tŭ hòi jà kă bro phan lơh gơs bơh suơn sre đah Hà Nội mờ ală càr, ƀòn dờng, mờ kung tơrbŏ bal cau lơh gơlik phan bơh suơn sre, brê bơnơm, phan tàm dà đah ală càr, ƀòn dờng mờ drà kă bro Hà Nội.

Lam lơh bơh nhai 9 tus tŭ do, Cribơyai tơrbŏ bal phan lơh gơs bơh suơn sre 970 neh bơyai lơh geh 7 dơ̆, bè: tac phan lơh gơs bơh suơn sre gam ris ai ƀòn dờng Hồ Chí Minh in tàm tơngai ơm yah ngài; tac phan lơh gơs bơh suơn sre ai tiah Tây Nguyên in; tac phan lơh gơs bơh suơn sre ai càr Bình Dương in; tac phan lơh gơs bơh suơn sre càr Đồng Tháp... Bơh ală cribơyai do, neh geh git nđờ rhiang sră hơ pơrgon kă bro đah mpồl lơh gơlik mờ jơnau kờñ blơi phan lơh gơs bơh suơn sre geh kĭ, bơh sơn rờp crơng gơs git nđờ jơt ròt mpồl lơh bal lơh gơlik, tac phan lơh gơs bơh suơn sre kơ̆ kơljap.

Cau mblàng K’Duẩn