VOV4.K’ho- Drim ngai 29/6, Tổng cục Thống kê yal khà kờp lơh sa- mpồl bơtiàn 6 nhai bồ nam. Pal sền gròi là bulah tàm tơngai kòp Covid-19 bơtờp uă tàm uă tiah, mơya kờp jơh phan lơh gơs tàm lơgar (GDP) 6 nhai bồ nam kung gam gơguh 5,64%.

Tàm khà gơguh bal bơh gùt rài lơh sa dê tàm nggùl bồ nam do, tiah lơh sa suơn sre, brê bơnơm, phan tàm dà gơguh 3,28% pơndrờm mờ bal dùl tŭ nam lài. Broă lơh priă jền, ngân hàng mờ bảo hiểm gơguh 9,27%. Tiah lơh sa mờ măi mok, bơt bơtàu gơguh 8,36%. Bulah tàm tŭ tơngai kòp bơtờp gơ rềng ờ niam tus broă lơh sa, kă bro mơya khà mpồl lơh sa kă bro cih mat crơng gơs pa tàm 6 nhai bồ nam kung gam geh rlau 67 rbô mpồl lơh sa kă bro, gơguh 8,1% pơndrờm mờ bal dùl tŭ nam lài mờ gơguh 34,3% bè priă bơcri cih mat. Bơta gơguh uă bè khà mờ priă bơcri bơh mpồl lơh sa kă bro cih mat crơng gơs pa dê ai gŏ bơta lơh ngan mờ nùs nhơm sơn đờm mut lơh broă bơh ală mpồl lơh sa kă bro dê.

Cau mblàng K’Duẩn