VOV4.K’ho – Drim òr (4/1), tàm Hà Nội, Tập đoàn ồs đèng Việt Nam (EVN) bơyai lơh pơrjum mut lơh rơndap broă nam 2018. Đơs tàm pơrjum, Phó Thủ tướng, ồng Trịnh Đình Dũng đơs loh, Tập đoàn ồs đèng Việt Nam pal pơn jat tai đơs tờm gơnoar là Tập đoàn dà lơgar, geh gơnoar tờm ngan tàm broă lơh kơnòl pờ ồs đèng. Lài ngan, pal gàr tơl đèng ai bơtàu tơnguh lơh sa - mpồl bơtiàn in, pơ gồp bơnah tàm bơtàu tơnguh lơh sa dà lơgar dê, lơh ngan lơh geh khà gơguh lơh sa nam 2018 rlau mờ rơndap broă là bơh 6,5 tus 6,7%; ờ lời tiah đah jum dà lơgar gơtìp ờ tơl đèng.

Kuơ màng, lơh ngan tam gơl pa, rơndap sap sèng wơl mpồl pờ tơlik ồs đèng, tac rah rài ồs đèng, ngui gùng che đèng mờ drà kă bro ồs đèng jat rơndap broă bal sap sèng wơl mpồl lơh sa kă bro dà lơgar gơwèt EVN, tơngai bơh nam 2017 tus nam 2020, nàng dong drà kă bro tac ồs đèng tàm pơr lòng lơh broă geh cồng nha, mơkung dipal mờ rơndap broă bơtàu tơnguh drà kă bro tac rah rài ồs đèng tàm pơr lòng.