VOV4.K’ho- Roh brê tàm Tây Nguyên kung gam là bơta jê bồ jê tơngoh. Pal sền ngăc ngan là, tàm tŭ tơngai brê gơtìp koh kơl uă ngan, uă kuang bàng xã neh dan “pờ tê”, dan ơm lơh broă, uă cau tờm brê neh lời tê ờ jai tai. Tàm tŭ hơ̆, dùl bơnah ờ dùl êt nă kuang bàng den kŭp tê bal mờ bol mus brê mờ geh tŭ là gơlik gơs wơl bol mus kơñau brê. Kuang bàng mus kơl brê, sơgràm ù brê gơtìp gŏ ngai sơlơ uă. Kơn jơ̆ rlau là tàm tŭ sền gàr brê bơh jŏ sùm neh kal ke, priă jền bơcri ai gah lơh broă brê bơnơm in bơh jŏ neh dùl êt ngan, den gam gơtìp tam pìt tai, sa kuề sa kuà, lơh tus broă sơlơ ngai sơlơ ờ niam ngan tĕ. Do ngan ngồn là dùl jơnau kơlôi rơcăng dờng ngan, tài bơh kơlôi rơcăng rơngòt roh brê mơkung pal rơcăng ngăc să tờm kuang bàng geh jàu gơnoar broă, kơnòl broă sền gàr brê tơn.

Lòt jăt gùng kòn lòt gan bă brê 1148 bơh Công ty Trách nhiệm hữu hạn Một thành viên Lâm nghiệp Krông Bông dê, tàm xã Cư Pui, kơnhoàl Krông Bông, càr Dăk Lăk, rơnah rơñơ jơh ală bă brê pa gơtìp koh kơl, chu aniai. Ơm ntàu kềng gah tờm chi dơm dờng neh gơtìp ồs sa rơđồ jù chơ̆t ntàu mơya gam yồng kƀàng “bañ koh aniai, chu brê, sơgràm ù brê”, bol añ sền gŏ dùl ròt chi dơm dờng, dơm dềt gơtìp ồs sa rơñah rơñơ jơh, dơm chi tơn bĭc bềng ngan. Uă nggu chi pa gơtìp òt gơ pừ, ơnàng tờm tus di bàr nă cau dờng ùt. Pơn jăt tai lòt mŭt jrô tàm brê, ai măt sền là gŏ ală dòr bơnơm tàm pơn jăt bal neh gơtìp mus kơl jơh bơh jơng dòr bơnơm tus hơđang bồ bơnơm. 5 nhai bồ nam 2021, Công ty gŏ tus 427 dơ̆, lơh hoàc hươr pơgăp 105 lồ brê. Ờ gơtùi ngan rlau, tŭ kờp sền wơl sền gŏ bă brê gơtìp mus kơl tơngai bơh nam 2014- 2020 gơguh tus rlau 2 rbô 500 lồ. Ồng Nguyễn Đức Trường- Kuang ătbồ Phân trường sồ 1, Công ty TNHH Một thành viên Lâm nghiệp Krông Bông dờp bơta ờ jai tềng đăp jơnau geh ngan mus kơl brê gơbàn uă ngan, ờ jai gròi sền tai tàm tơngai do. Ồng Nguyễn Đức Trường, đơs: Mus kơl brê den tŭ do rơlăc rơliang ngan. Khai geh cau gàr tơngkah lài khai in, mạng viễn thông bềng làm bă tiah rao, oh mi lòt lơh broă den khai tam yal bal mờ gơ̆p in, den tàng broă gŏ, kŭp tơn cau mus kơl brê là kal ke ngan. Oh mi neh lơh jơh bơta pràn rao, mơya ờ rơgơi jai kơryan jơnau mus brê bè tŭ do ờ.

Dùl bă brê tàm Brê 1148 bơh Công ty Lâm nghiệp Krông Bông dê gơtìp mus kơl

Ndrờm bè Krông Bông sơl, jơnau mus kơl brê geh tềl tơngŏ ờ jai gròi sền, ờ jai ătbồ tềng đăp jơnau mus brê, sơgràm ù brê gam gơlik geh uă ngan tàm Tây Nguyên. Dùl ròt ală anih sền gŏ gơtìp roh brê uă ngan, bơh gĭt nđờ rhiang lồ tus gĭt nđờ rbô lồ tơl anih. Lòt tus tiah lơi, brê kung rơñah rơñơ jơh lơm. Ồng Lê Quang Dần- Phó Kuang ătbồ Sở Nông nghiệp mờ Phát triển Nông thôn càr Dăk Nông đơs, bal mờ ală bơta ờ pràn jak bơh cau tờm brê dê den gam geh jơnau dờng bơh gùng dà broă lơh kơrnoat boh lam lời ai gah lơh broă brê bơnơm mờ ai cau sền gàr brê in gam geh bơta ờ hềt dipal ngan. Ồng Lê Quang Dần, đơs: Ală kơrnoat, gùng dà broă lơh ờ hềt loh làng ngan, ờ hềt dipal ngan. Ù tiah den dờng ơnàng ngan, bơta kơn jơ̆ bè làng bol ơm kis, lơh sa, mpồl bơtiàn tus tàm broă lơh ătbồ, sền gàr brê uă ngan. Tàm tŭ hơ̆, bơta pràn lơh broă bơh ală công ty dê lơh broă ờ tơl ngan, ngan là priă jền mờ kòn bơnus nàng sền gàr brê.

Tàm tŭ brê gam gơtìp mus kơl aniai, cau sền gàr brê bơh jŏ neh ờ tơl uă ngan den tŭ do, tàm uă anih, dùl ròt kuang bàng, cau lơh broă sền gàr brê “dan pờ tê”, lơh sră dan ơm lơh broă. Jơnau là tài bơh bă brê geh jàu dờng, kơnòl broă kơn jơ̆ ngan mơya jàu gơnoar ờ loh làng, phan ngui dong kờl ờ geh, kuang bàng sền gàr brê sùm ơm tàm bơta ờ pràn tềng đăp mờ bol mus kơl brê kơñau. Tàm tŭ hơ̆, priă lơh geh dùl êt ngan, rài kis bơh ală cau să tờm tơn sền gàr brê dê ờ gŏ geh tơl. Tàm Công ty Lâm nghiệp Krông Bông, tàm 3 nam do, geh 16 nă kuang bàng, mìng là kỹ sư, ăt gơnoar đơng lam bồ kấp phòng, phân trường, dan ơm lơh broă. Ai tàm Công ty Lâm nghiệp Ea Kar, mìng tàm pơgăp rlau 1 nam do, 17 tàm 45 nă kuang bàng, kuang đơng lam bồ, cau lơh broă dan ơm lơh broă. Dùl nă kuang bàng tàm Công ty Lâm nghiệp Ea Kar dê pà gĭt, 3 tàm khà 5 nă kuang bàng tàm phân trường neh ơm lơh broă mờ să tờm bi kung neh lơh sir sră dan ơm lơh broă sơl, gam ơm kơ̆p geh bơsong. Bi đơs: Priă nhai añ dê là 3 tơlak 200 rbô đong, pal tă tai priă tờm he dê nàng lòt lơh broă. Mờ bơta kơn jơ̆ tàm broă lơh kal ke rlau tai, cau lơh broă ờ tơl nàng ătbồ. Dơ̆ pe là kơnòl broă, lời mus kơl brê uă ir den kung tuh kơnòl cau tờm ătbồ tiah hơ̆ in sơl. Dilah tuh kơnòl bè adat boh lam den là ờ gơtùi lơh broă geh ờ. Đơs bal là hơđang den pơhìn, hơđơm den kơn jơ̆ ngan, kơlôi rơcăng ngan, ờ jai lơh broă jŏ jòng ờ.

Mpồl cau sền gàr brê Công ty Lâm nghiệp Krông Bông dê ờ jai tai

Ờ gŏ di ờ hềt dipal bè gùng dà broă lơh, kơrnoat boh lam tàm broă ătbồ mờ sền gàr brê lơm, uă cau tờm brê đơs là, broă ờ geh bơta pơgồp bal bơh gơnoar ătbồ, gah lơh broă geh gơnoar tàm tiah do dê tàm broă bơsong ală dơ̆ broă lơh tìs là jơnau tờm lơh khi pal pờ tê ờ jai tềng đăp jơnau mus brê, sơgràm ù brê. Ồng Nguyễn Đức Phúc- Kuang ătbồ Công ty Cổ phần nhơl chờ ƀòn brê bơnơm Phương Nam, càr Lâm Đồng geh jơnau đơs: Añ tam brê bơkah mơnga ngan, khi ai rơnđòt tus òt tĕ, añ kung kŭp sơl mờ lơh sră pơ àr mờ jàu mơya tơnơ̆ hơ̆ kung ờ gŏ geh cau lơi bơsong jơh sơl. Jơnau là hòi ồng chủ tịch xã in den ồng hơ̆ đơs là lời hòi cau lơh broă tus, mơya ơm kơ̆p tus trồ mang den să tờm añ mbè mờ jai kŭp gàr cau, mờ bè hơ̆ den sền là ờ jai.

Tŭ neh ờ jai, pờ tê tềng đăp jơnau mus brê, uă cau tờm brê, ngan là ală mpồl lơh sa kă bro làng bol dê geh jàu, ai apah brê tàm Tây Nguyên neh lời khăt bè ai brê in gơtìp mus kơl gơlam tus dùl ròt bă brê gơtìp mus kơl lề trak jơh. Bè tàm kơnhoàl Ea Súp, tiah geh uă rơndăp broă ai làng bol in apah brê uă rlau jơh càr Dăk Lăk bal mờ mờr 30 rơndăp broă lơh, kờp jơh 17 rbô lồ ndrờm bè ờ gam tềl tai bơh brê dê. Dùl nă kuang đơng lam bồ Hạt kiểm lâm kơnhoàl Ea Súp, yal bè bơta geh ngan bè do: Bơta geh ngan là ndrờm bè ờ lơh geh bơta lơi, brê gơtìp mus kơl jơh. Kĭ ai khi in mŭt tàm do, khi ờ lơh, lời sơrbì khăt bè tềng hơ̆, brê gơtìp mus kơl khăt bè, làng bol sơgràm jơh, tŭ do kơnòl gơ rê mờ cau lơi, cau lơi lơh broă do. Añ sền gŏ loh làng là, kờp bal kơnhoàl kung sền gŏ sơl ờ geh cồng nha mơya ñchi gơlơh bè hơ̆ sùm hah.

            Cau mblàng Lơ Mu K’Yến