VOV4.K’ho - Tàm ƀòn dờng Buôn Ma Thuột, Anih tờm bơto pơlam broă lơh sa suơn sre-Sơntìl phan tam, phan ròng mờ phan tàm dà càr Dăk Lăk pơgồp bal mờ Anih bơto pơlam broă lơh sa suơn sre Dà lơgar bơyai lơh tơn jơh Rơndăp broă “Bơ̆t bơtàu mờ tơnguh bơtàu broă tam bơrlŭ bal ờ uă bơta tờm chi sa plai tàm suơn kơphe tiah Tây Nguyên” tơngai bơh nam 2019 tus 2021, lơh jăt tàm 4 càr Tây Nguyên, tàm hơ̆ geh càr Dăk Lăk, Dăk Nông, Gia Lai mờ Lâm Đồng, mờ 115 lồ ù tam bơrlŭ bal tờm ƀơ mờ sầu riêng tàm suơn kơphe.

              Làng bol lơh broă sa càr Dăk Lăk tơnhào plai sầu riêng tam bơrlŭ bal tàm suơn kơphe

Mìng is tàm càr Dăk Lăk, tàm 3 nam bơh nam 2019 tus 2021, rơndăp broă lơh do geh 55 lồ ù tam bơrlŭ bal tàm ală kơnhoàl Cư̆ Mgar, Krông Búk, Krông Năng, Ea H’leo mờ thị xã Buôn Hồ, mờ 55 hìu tus bal rơndăp broă lơh do neh dong kờl broă lơh 70% bè sơntìl mờ phan lơh broă, phơng sih; bơyai lơh pờ ală ơdŭ bơto pơlam, khoa học kỹ thuật bơto sồr ai ală hìu làng bol in tus bal mờ broă lơh do nàng ngui. Kờp dŭ, tŭ tờm chi sa plai tàm tơngai geh plai geh tơnguh rơlao 20% khà priă geh di lah pơn drờm mờ broă mìng geh tam kơphe lơm, gơmù rềs àr tŭ drà kă bro phan geh lơh bơh broă lơh sa suơn sre gơtìp tam gơl uă bè tŭ do.

Cau mblàng Ndong Brawl