VOV4.K’ho- Kuang àng càr Dăk Lăk pa bơyai lơh broă lơh tìp măt ờs mờng Tơngkah kir sơnrai 90 nam Ngai crơng Đoàn Ơruh pơnu Cộng sản Hồ Chí Minh (26/3/1931- 26/3/2021). Tàm dơ̆ tìp măt, ală cau ala măt neh yal wơl bơhiàn 90 nam crơng gơs Đoàn Ơruh pơnu Cộng sản Hồ Chí Minh, bal mờ gơ̆p sền wơl nùs nhơm lam lài, lơh broă dong kờl is bơh rơnàng kơnòm să Kuang àng càr dê tàm ală tiah, ală broă, pơgồp bơnah gàr niam bơta lơngăp lơngai rơndăp tăp sèng, ờdo ờdă jơh gùt mpồl bơtiàn tàm ù tiah càr dê.

Mìng is tàm nam 2020, ală mpồl Đoàn tàm jơh gùt Kuang àng càr Dăk Lăk neh lơh 126 dơ̆ mpồl bơtiàn bơta nđàc tàm ală thôn, ƀòn, xã bal mờ kờp jơh priă mờr 3 tơmàn đong; jàu 23 bơnah priă dong kờl bơsram “Dong kờl oh lòt bơsram” ai kơnòm bơsram geh rài kis kal ke in, bal mờ khà priă là rlau 82 tơlak đong; pà 20 nơm chèu biài dră khuẩn mờ phan bơna pal geh, kờp priă rlau 150 tơlak đong dong kờl làng bol rơcăng sơndră kòp Covid-19. Mơkung hòi jà, pơgồp bal pơndiang 8 tấn phan, 420 tơlak đong priă măt dong kờl làng bol tiah đah tàm gùl lơgar gơtìp gơrềng tài bơh trồ tiah lơh aniai; tus bal pà mờr 600 kơldung mhàm.

Tỉnh đoàn Kon Tum pa pơgồp bal mờ Sở Giáo dục mờ Đào tạo bơyai lơh Ngai chờ “Kơnòm dềt chờ hờp, pràn kơldang- Brồ guh mut Đoàn”. Tàm ngai chờ, ală kơnòm bơsram geh tus bal lòt tàm gùng jat bơhiàn ờs mờng đội gơ jat bal mờ pơrjum ờs mờng gờm chờ tơngkah 90 nam ngai crơng gơs Đoàn Ơruh pơnu Cộng sản Hồ Chí Minh ngai 26/3, bơyai lơh ală jơnau đơs crih tamya geh tơngime bè ƀòn tờm dà lơgar, bè bơhiàn bơh Đoàn ơruh pơnu Cộng sản Hồ Chí Minh mờ kơnòm dềt Việt Nam. Di tŭ do, Tỉnh đoàn Kon Tum jàu 13 bơnah priă dong kờl bơsram ai ală kơnòm bơsram geh cồng nha bơsram jak ngan in tàm tơngai bơsram pa do.

Cau mblàng LơMu K’Yến mờ K’Duẩn