VOV4.K’ho- Tàm Tây nguyên, kòp gam gơlik geh kal ke ngan, ngan là tàm càr Dăk Lăk là tiah neh geh khà rlau 1 rơbô nă cau bơtờp kòp Covid-19, tơrgùm tàm uă ƀòn, lơgar làng bol jơi tìan kòn cau dê. Lơh ngan sơndră kòp kờñ ngan geh bơta sơm bat tê bal, pơgồp bal bơta pràn mờ bơta gĭt wă loh làng, di pal bơh tơl nă làng bol dê.

Ƀòn Kmrơng Prong A, xã Ea Tu, ƀòn dờng Buôn Ma Thuột, càr Dăk Lăk tŭ do geh mờr 550 hìu bơnhă làng bol bal mờ 2 rbô 200 nă cau, uă ngan là cau Rơđê ơm kis. Broă gơlik geh bơh kòp bơtờp dê neh lơh gơ rềng uă ngan tus broă lơh sa mờ rài kis làng bol dê. Ơruh pơnu lòt lơh broă ngài, lơh công nhân tàm ală công ty, anih lơh sa mờ măi mok gam pal ơm rlô lơh broă tài bơh kòp. Ồng Y Yơh Kbuôr, kra ƀòn ƀòn Kmrơng Prong A yal, bơh tŭ dơ̆ bơtờp kòp Covid-19 dơ̆ 4 gơbàn wơl tàm càr Dăk Lăk mờ ală càr rềp bal, ồng Y Yơh Kbuôr bal mờ cau atbồ ală tổ liên gia neh lòt tus tơl hìu tàm ƀòn nàng sồr tơl nă cau lơh jat ală jơnau sồr bè rơcang sơndră kòp, tơngkah ală hìu bơnhă geh cau tờm pa rê bơh tiah ngài pal lòt yal bè tiah lòt rê mờ tam cah is tàm hìu. Tŭ kòp bơtờp gơlik geh kal ke rlau, làng bol kung neh jơh nùs lơh jat jơnau đơng lam bơh gơnoar atbồ dê bè ơm yah ngài mpồl bơtiàn mờ lơh jat nền nòn jơnau sồr rơcang sơndră kòp: “Gơ wèt mờ kòp Covid-19 den bol hi geh jơh bal cau atbồ ƀòn, ală mpồl lơh broă, mpồl cau, cau kra ƀòn neh geh bơta tàm pơgồp bal tơngkah tơl nă cau tàm ƀòn pal lơh jat nền nòn ală jơnau sồr bè rơcang sơndră kòp. Tơl nă cau ndrờm iat, lơh jat jơh nùs ngan, bơh cau kra tus kơnòm dềt ndrờm jơh nùs lơh jat broă rơcang sơndră kòp”.

Ồng Y Yơh Kbuôr tus hìu làng bol nàng mblàng yal rơcang sơndră kòp Covid-19

Lơh jat bơhiàn tam klăc bal, kờñ gơboh bal bơh jơi bơtiàn Việt Nam dê, ngai bơh chờm bơtờp kòp, kòn cau Rơđê tàm xã Cuôr Dăng, kơnhoàl Cư M’gar, càr Dăk Lăk neh tàm dong tàm kờl bal dong kờl gơnoar atbồ mờ ală mpồl lơh broă rcang sơndră kòp tơn, dong kờl bal mờ gơ̆p sơr lèt gan tơngai kal ke. Làng bol neh tơrgùm bal phan ngui, phan ngui sa kờñ pal geh ai làng bol tàm ală tiah ai ơm yah ngài in jat Chỉ thị sồ 16 bơh Thủ tướng Chính phủ dê. Ồng Y- Ƀhêñ Ayun (ồng Nik dê)- ơm tàm ƀòn Cuôr Dăng A, kơnhoàl Cư Mgar, càr Dăk Lăk pà gĭt: Añ kung chờ hờp ngan tài ală nùs nhơm bơh làng bol tàm ƀòn he dê tàm broă ai bal bơta pràn sơr lèt gan kòp dờng Covid-19, dong kờl ală ƀòn ndai gam pal ai ơm yah ngài, sơr lèt gan ală bơta kal ke tàm rài kis, gĭt dong kờl bal mờ gơ̆p tàm ală tŭ kal ke. Bol añ mìng hòi jà dùl dơ̆ lơm mờ làng bol lơh jat jơh nùs ngan. Kơ̆p kờñ là ală nùs nhơm dong kờl, tam klăc bal bơh kòn cau Rơđê he dê sùm lơh jat tàm tơl bơta kal ke tàm rài kis dê

Nàng rơcang sơndră kòp Covid-19, tŭ do, tàm jơh ală thôn, ƀòn, làng bol ndrờm git wă lơh jat nền nòn jơnau sồr 5K. Ală ngai do, tus mờ xã tiah ngài A Dơk, kơnhoàl Đăk Đoa, càr Gia Lai, ờ kal ke nàng sền gŏ rùp să làng bol sùm pơn chèu glòm muh mat tŭ lòt tàm gùng. Bi Rmah Seo, ơm tàm thôn Bía Tih, xã A Dơk, kơnhoàl Đăk Đoa đơs bè nùs nhơm sơndră kòp bơh làng bol tàm ƀòn dê: “Mùl màl den bơh tŭ gơlik geh kòp Covid-19 làng bol ngòt ngan, bơh ală gah yal tơnggit den geh git dŏ là kòp ngòt rơngơt ngan den tàng làng bol sơlơ ngòt rlau. Bulah bè hơ̆, geh bơta sền gròi bơh ală kấp, mpồl, gah broă lơh dê mblàng yal den làng bol git wă là pal sùm pơn chèu glòm muh mat, lơh jat jơnau sồr 5K bè rơcang sơndră kòp. Dilah ờ geh broă lơi kuơmàng den làng bol ơm tĕ tàm hìu mờ ờ huan ai lòt rê. Uă hìu bơnhă kung git blơi lài phan ngui pal geh pah ngai nàng prap rơcang lài. Làng bol rê bơh tiah geh kòp den lòt tam cah is rê tam cah is tàm hìu tai, ală cau lơh sơnơm kung sùm lòt sền mờ git broă gơlik geh. Kơp kờñ là kòp mhar jơh nàng làng bol in gam lơh broă, bơtàu tơnguh lơh sa, kơp kờñ dà lơgar geh ală broă dong kờl ngan ngồn ai ală cau gơtìp gơ rềng tài bơh kòp in”.

Kòp Covid-19 gam gơlik geh kal ke lơh rài kis bơh làng bol dê kong gơrềng uă ngan. Bulah bè hơ̆, làng bol sùm lơh jat niam ală jơnau sồr 5K bơh Bộ Y tế dê nàng bal mờ Đảng  mờ Dà lơgar kơryan kòp. Bi H’Lan, ơm tàm ƀòn Ka La Dơng, xã Quảng Khê, kơnhoàl Dăk G’Long, càr Dăk Nông đơs: Bơh tŭ kòp bơtờp tàm ù tiah xã dê đơs is mờ gùt lơgar đơs bal. Broă lơh jat niam bè rcang sơndră kòp Covid-19 tàm ƀòn bơh làng bol dê lơh jat niam ngan. Làng bol sùm lơh jat broă yal tiah lòt rê mờ gah lơh sơnơm tơl làm. Hìu lơi geh oh kòn lòt lơh broă tàm tiah ngài, tàm ală càr rê  tàm ƀòn ndrờm geh mblàng yal mờ hòi jà tus yal tiah lòt rê mờ gah lơh sơnơm, nàng mpồl lơh broă geh gơnoar in lơh broă ai ơm yah ngài jat jơnau sồr. Tŭ ală càr tiah đah Jum dà lơgar lơh jat broă ai ơm yah ngài gơtìp kal ke bè phan ngui, phan sa làng bol tàm ƀòn bulah gam uă ngan kal ke mơya phan bơna dùl ết nùs nhơm uă kung hòi jà tă pơgồp bal priă jền, biăp, plai đo pơyoa tàm pà bal mờ làng bol tàm tiah kòp in.

Là kơnhoàl rềp mờ ƀòn dờng Dà Làc, tiah gam gơlik geh kal ke bơh kòp Covid-19 dê mờ uă cau bơtờp kòp tàm mpồl bơtiàn, kơnhoàl Lạc Dương, càr Lâm Đồng neh sơlơ tơnguh ală anih gròi sền kòp tàm tiah rềp nhàr nàng kờñ sền gròi bơta lơh bơtờp kòp, gàr tiah tơlir ờdo ờdă ờ geh cau bơtờp kòp. Tàm anih gròi sền kòp Covid-19 tàm gùng dờng 27B, gơl rềp mờ sơnah ƀòn 12, ƀòn dờng Dà Làc, rlau 30 nă cau tàm pơ dờn gròi sền sùm ngai mang, tàm hơ̆ geh uă ngan là cau jơi bơtiàn kòn cau dùl êt nă cau. Jat ồng Krăjañ Ha Khiêu, kuang àng cau K’ho, bal mờ ală cau ndai, ồng geh sồr ơm gròi sền tàm do bơh bồ tơngai gơbàn kòp. Broă lơh bulah bòl glar, kal ke, ngan là tŭ trồ tiah ờ niam, mơya tài bơta ờdo ờdă bơh làng bol dê, tơl nă cau ndrờm lơh ngan jơh pràn at tê bal kơryan kòp bơtờp mờ nùs nhơm geh kơnòl uă ngan rlau jơh: “Jat bơta jàu kơnòl broă bơh kấp hơđang dê den añ tus bal gròi sền mờ oh mi tàm anih gròi sền, dong kờl broă sền sơ wì nàng sơndră kòp, sền gàr tiah ờ geh kòp bơh kơnhoàl dê kung bè sền gàr pràn kơldăng să jan ai làng bol in. Broă lơh bol hi dê là sền sơ wì jơh ală rơndeh rơndồ lòt rê, sồr khi yal bè tiah lòt rê tơl làm, ngan là sền gròi ală cau bơh tiah ndai mut tàm ală ƀòn nàng kờñ kơryan kòp, ờ lời kòp bơtờp tàm ƀòn, làng bol iang nùs lơh broă nàng bơtàu tơnguh lơh sa”.

Cau mblàng K’Hạnh mờ K’Duẩn