VOV4.K’ho – Kă bro ờm dơm chi, blac pơr lồm kă bro xăng zờu, phơng sih, sơnơm sền gàr phan tam ờ ngan tàm Tây Nguyên gam gơlik geh kal ke. Hơ\ là jơnau đơs bơh Văn phòng Thường trực Mpồl đơng lam rơcang sơndră kă bro phan pồ tă dia, blac pơr lồm kă bro mờ phan ờ ngan dà lơgar tàm dơ\ tàm jàu broă lơh 5 càr Tây Nguyên drim òr (9/1).

Tàm nam 2017, anih lơh broă geh gơnoar 5 càr Tây Nguyên neh git go\ mờr 16 rbô broă lơh tìs, tă dia dà lơgar in 140 tơmàn priă, lah yă hình sự 159 broă lơh tìs, 159 nă cau tìs. Duh hồl ngan rlau jơh là broă lơh kă bro ờm, koh kơl, pơndiang dơm chi mờ mờr 3 rbô broă lơh tìs, tă dia 65 tơmàn priă.

Mpồl đơng lam rơcang sơndră kă bro phan pồ tă dia, blac pơr lồm kă bro mờ phan ờ ngan dà lơgar đơs là, ală anih lơh broă geh gơnoar 5 càr Tây Nguyên kung gam uă bơta ờ niam. Broă lơh git ală bơta gơlik geh tàm bă tiah kuơ màng, broă mut lơh, cau lơh tìs ờ hềt git lài, ờ hềt jat bơta geh ngan; ờ huan geh bơta pơ gồp bal, yal, tam pà jơnau tơnggit đah ală mpồl lơh broă geh gơnoar. Mpồl đơng lam dà lơgar sồr ală anih lơh broă geh gơnoar ală càr Tây Nguyên pal sền gròi uă tàm broă lơh dră wơl kă bro phơng sih, sơnơm sền gàr phan tam ờ ngan, ờ niam.