VOV4.K’ho- Tàm poh lài, tàm tiah Tây Nguyên (ngan là bàr càr: Dăk Lăk mờ Kon Tum) sùm gŏ uă cau kòp Covid-19, tàm hơ̆ pal kơlôi rơcăng ngan là ală mpồl cau kòp bơtờp tàm mpồl bơtiàn. Tềng đăp bơta do, gơnoar ătbồ bal mờ mpồl lơh broă geh gơnoar neh sơlơ gròi sền nàng kờñ kơryan tiah lơh bơtờp kòp. Mpồl ƀác sĩ bơh Hìu sơnơm Chợ Rẫy ƀòn dờng Hồ Chí Minh dê kung neh tus càr Dăk Lăk nàng dong kờl tam dră mờ kòp Covid-19.

Tàm càr Kon Tum, tơnơ̆ tŭ gŏ gĭt nđờ jơ̆t nă cau bơtờp mờ virus Sars CoV-2 tàm mpồl bơtiàn, bơh poh lài, mpồl lơh broă geh gơnoar bơh càr dê neh tus wàng se tiah geh kòp tàm uă tiah, jòi ală cau F1, F2, F3 nàng kơryan tiah lơh bơtờp kòp Covid-19 tàm mpồl bơtiàn mờ tàm ală tiah ơm yah ngài tơrgùm bal. Tơnơ̆ hơ̆ tơn, Ủy ban Nhân dân càr Kon Tum neh bơyai lơh dơ̆ pơrjum pờ tơn tàm internet mờ 10 kơnhoàl, ƀòn dờng mờ 102 xã, sơnah ƀòn, thị trấn bơh càr dê. Đơs sồr lơh tàm dơ̆ pơrjum jal mhar do, Chủ tịch Ủy ban Nhân dân càr Kon Tum sồr ală tiah lơh jăt niam broă wàng se tiah geh kòp, bal mờ hơ̆ lơh jăt niam broă lơh gròi sền tiah lơh bơtờp kòp Covid-19 tàm mpồl bơtiàn tàm ală tiah ơm yah ngài tơrgùm bal.

Ồng Lê Ngọc Tuấn, đơs: Ală tiah ơm yah ngài tơrgùm bal là gal ngan cau, digơlan lơh gơlik bơta tàm bơtờp bal tàm tiah ơm yah ngài. Mpồl ătbồ tiah ơm yah ngài pal sơlơ gròi sền tiah ơm yah ngài tơrgùm bal, tiah ơm yah ngài sơm kòp. Ơm yah ngài tàm hìu lơh niam mpồl lơh broă kòp Covid-19 mpồl bơtiàn, geh bal jơh ală anih lơh broă chính trị jăt sền. Dilah gŏ cau lơi ơm yah ngài tàm hìu mờ lơh jăt ờ kràñ den sồr jun lòt ơm yah ngài tơrgùm bal.

Dùl tiah jăt sền pràn kơldang să jan mpồl bơtiàn tơnơ̆ tŭ ơm yah ngài tơrgùm bal tàm sơnah ƀòn Lê Lợi, ƀòn dờng Kon Tum

Tàm Pơrjum tàm jàu broă lơh sră ƀăo nhai 10 pa do, geh Ban Tuyên giáo Tỉnh ủy Kon Tum dê lơh, Phó Kuang ătbồ Cơldŭ lơh broă Ủy ban Nhân dân càr Kon Tum dê ồng Nguyễn Đình Cầu pà gĭt, càr pơn jăt tai gàr sùm anih gròi sền kòp tàm ală gơl gùng rơndeh dờng mŭt tàm càr. Do là ală anih gròi sền kòp ờ gŏ di là anih gròi sền gùng lòt den tàng càr geh ờ gŏ sờr sơrbì. Bơta geh ngan pà gŏ, mpồl lơh broă geh gơnoar neh gŏ bàr pe nă cau bơtờp mờ virus Sars CoV-2 tàm Anih gròi sền kòp sồ 01 Sao Mai, ƀòn dờng Kon Tum mờ Anih gròi sền kòp sồ 02 kuèl kơh Lò Xo, kơnhoàl Đăk Glei tàm gùng Hồ Chí Minh. Gơwèt mờ bơta lơh bơtờp kòp Covid-19 tàm ală tiah ơm yah ngài mờ tàm mpồl bơtiàn, ồng Nguyễn Đình Cầu, pà gĭt: Tơnơ̆ tŭ ơm yah ngài tơrgùm bal 14 ngai den tàm tiah ơm yah ngài uă ngan cau xét nghiệm 3 dơ̆ ndrờm âm tính lơm. Mơya geh ală cau rê di bàr pe ngai tơnơ̆; puan, pram ngai tơnơ̆ là sơnđờm bơtờp wơl. Bơta do gơ tơlik dùl bơta là tơngai gơdram kòp jŏ, bơdìh hơ̆ tai geh dùl bơta digơlan tai là ờ gĭt là tàm bơtờp tai sơl halà ờ. Bơta dơ̆ bàr, tơnơ̆ tŭ lòt ơm yah ngài tơrgùm bal rê ơm yah ngài tàm hìu, cau ờ hềt lơh jăt di jơnau sồr, ờ lơh jăt jơh nùs den tàng neh lơh bơtờp tus mpồl bơtiàn. Broă mờ jăt sền bơh ală mpồl lơh broă kòp Covid mpồl bơtiàn dê lơh broă ờ hềt jơh kơnòl.

Tềng đăp bơta làng bol jơh tơngai ơm yah ngài tơrgùm bal rê lơh jăt ơm yah ngài, jăt sền pràn kơldang să jan tàm hìu den hơ̆ sồng gŏ bơtờp mờ virus Sars CoV-2 gơlam tus lơh bơtờp kòp tus mpồl bơtiàn, bàr pe kơnhoàl, ƀòn dờng bơh càr Kon Tum dê hòi jà làng bol dan cih mat ơm is wơl tai tàm tiah ơm yah ngài tơrgùm bal 07 ngai tai.

Tàm càr Dăk Lak, poh lài gơ gơs là “tiah bơtờp uă ngan” bè kòp Covid-19, tŭ sùm gŏ uă mpồl cau kòp tàm mpồl bơtiàn, ngan là tàm ƀòn dờng Buôn Ma Thuột. Ngan là geh dùl ngai gŏ 174 nă cau bơtờp kòp Covid-19, do là khà cau bơtờp kòp uă ngan rlau jơh bơh lài tus tŭ do kờp bơh tŭ dơ̆ bơtờp kòp dơ̆ 4 lơh bơtờp. Tàm hơ̆, geh gĭt nđờ jơ̆t nă cau kòp geh gŏ tàm mpồl bơtiàn, tơrgùm uă tàm ală kơnhoàl: Cư Mgar, Krông Buk, thị xã Buôn Hồ mờ ƀòn dờng Buôn Ma Thuột.

Mpồl lơh broă bơh Hìu sơnơm Chợ Rẫy ƀòn dờng Hồ Chí Minh dê lòt sền tàm Khoa Sơm kòp kơn jơ̆ mờ Lơh pràn wơl Tam dră mờ bơta khih jơh nùs bơh Hìu sơnơm dờng tiah Tây Nguyên dê

Tềng đăp bơta hơ̆, poh lài, mpồl ƀác sĩ bơh Hìu sơnơm Chợ Rẫy ƀòn dờng Hồ Chí Minh dê neh tus Dăk Lăk dong kờl tam dră mờ kòp Covid-19. Tàm ƀùi drim bơh sơnrờp tŭ tus Dăk Lăk, mpồl lơh broă bơh Hìu sơnơm Chợ Rẫy dê neh geh dơ̆ lơh broă mờ kuang đơng lam bồ bal mờ mpồl cau ƀác sĩ bơh Hìu sơnơm dờng tiah Tây Nguyên dê. Ƀác sĩ Nguyễn Đại Phong- Kuang ătbồ Hìu sơnơm dờng tiah Tây Nguyên pà gĭt, ală tă pơgồp bơh mpồl lơh broă dê bè broă kham sac rwah, ơm yah ngài mờ sơm kòp ai cau kòp in geh dong Hìu sơnơm lơh sir niam rlau tàm broă lơh sơm kòp ai cau kòp Covid-19 in. Ƀác sĩ Nguyễn Đại Phong, đơs: Mpồl cau lơh broă bơh Hìu sơnơm Chợ Rẫy dê khi geh uă ngan bơta mờng chài tàm broă sơm kòp ai cau kòp Covid-19 in tàm ƀòn dờng Hồ Chí Minh kung bè tàm tiah đah jum dà lơgar, tiah tàm gùl lơgar, tŭ tus ndo, cau neh dong kờl ai Hìu sơnơm dờng tiah Tây Nguyên in gŏ geh jơh ală bơta ờ hềt wil tơl mờ hìu sơnơm gam ờ hềt lơh sir. Bơta kuơmàng là khi geh dong kờl ai Hìu sơnơm in bè broă lơh sơm kòp mờ jơh ală phan bơna măy mok kung bè phan bơna măy mok ờ tơl den khi geh dan dong kờl bơh Hìu sơnơm Chợ Rẫy kung bè dan mờ Bộ Y tế.

Poh lài, mpồl kuang bàng lơh sơnơm bơh Hìu sơnơm Chợ Rẫy dê neh tus sền ală hìu sơnơm ing, ală tiah sơm kòp, tiah ơm yah ngài; tă pơgồp jơnau đơs tàm broă rơndăp lơh ai càr in tàm broă tam pà kơnòl sơm kòp, tàm pơgồp bal cau kòp; tus bal ală dơ̆ pơrjum mờ Mpồl đơng lam rơcăng sơndră kòp Covid-19 càr Dăk Lăk; pơrjum pờ tơlik tơn tàm internet mờ mpồl cau lơh sơnơm mờ kuang đơng lam bồ càr, ală hìu sơnơm kơnhoàl, ƀòn dờng, thị xã...Mờ tŭ do, ală ƀác sĩ, cau sền gàr cau kòp bơh Hìu sơnơm Chợ Rẫy dê pơn jăt tai ơm wơl tai dùl poh nàng dong kờl càr Dăk Lăk tàm broă lơh rơcăng sơndră kòp mờ sền gàr, sơm kòp ai cau kòp Covid-19 in.

                              Cau cih VOV Tây Nguyên- Cau mblàng Lơ Mu K’Yến