VOV4.K’ho- Tiah Tây Nguyên gam là tơngai ro kơnrañ ngan rlau jơh, gơnoar ătbồ ală kấp mờ gah lơh broă geh gơnoar gam lơh ngan bal mờ làng bol rơcăng lài ngui ală broă lơh nàng tam dră mờ trồ prang soăt dà ai chi tam in. Bal mờ broă tam pà dà dipal bơh ală broă lơh bơtơ̆t dơng dà, gah lơh broă geh gơnoar mblàng yal ai làng bol in tơnguh uă bơta gĭt wă ngui dà tềm pềr nàng tam dră mờ trồ prang soăt dà.

Tàm càr Kon Tum, dà bơh 73 nơm tơnau dơng dà dờng dê gam 65% rlau hơđang. Bal mờ hơ̆, dà bơh 98 bơtơ̆t dơng ngơr dà mờ 7 trạm ƀồm dà mờ đèng digơlan ai tơl dà tuh ai mờr 11 rbô lồ chi tam kàl mrềt prang in bal mờ uă ngan là kòi sre mờ chi jŏ nam. Mơya, dilah kàl prang gam jŏ jòng pơhìn gơbàn ờ tơl dà tuh tàm ală bă ù lồi bơtơ̆t tơnau dơng dà là kal ke ngan gơtùi pleh klàs. Ồng Văn Tất Cường, Phó Kuang ătbồ Sở Nông nghiệp mờ Phát triển Nông thôn càr Kon Tum pà gĭt, nàng kơryan tus khà lơyah ngan rlau jơh hoàc hươr tài bơh trồ prang dờng soăt dà lơh aniai, gah lơh broă sa sươn sre càr dê gam jơh nùs rơcăng lài tam pà dà, mơkung bơto sồr làng bol ngui dà tuh tềm pềr mờ geh cồng nha.

Ồng Văn Tất Cường, Phó Kuang ătbồ Sở Nông nghiệp mờ Phát triển Nông thôn càr Kon Tum, pà gĭt: Bol añ jàu ai Chi cục bơtơ̆t rbòng dà in sùm sồr ngan, pơgồp bal niam mờ ală Phòng Nông nghiệp kung bè ală Anih tờm Drơng broă Lơh broă sa sươn sre nàng ătbồ dà mờ sơndră trồ prang soăt dà. Geh bàr pe kơnhoàl den đơs là digơlan tàm lồi kàl là gơbàn soăt dà tàm bàr pe tiah. Ală tiah do uă ngan mìng tơrgùm tàm ală broă lơh bơtơ̆t dơng dà mờ tŭ do bơh ală kơnhoàl ătbồ halà tàm ală tiah, ală chàr bơnơm, dòr bơnơm làng bol tam is phan. Bol añ kung neh sồr gơnoar ătbồ tiah do sền gròi uă, sơlơ tơnguh tai ală broă lơh bơ̆t nàng gàr dà mờ kuơmàng là lam lơh ală broă lơh tuh dà tàm pơdar nàng gàr niam khà dà drơng broă lơh sa in.

Tơnau dơng dà Đăk Ui, càr Kon Tum ai tơl dà tuh

Tàm càr Dăk Lăk, tŭ do geh 208 rbô lồ kơphê gam tàm tơngai kờñ ngan tuh dà. Jơnau kờñ dà là uă ngan tàm tŭ dà nàng tuh den soăt uă ngan sùm là jơnau kal ke ai cau tam kơphê tàm uă nam do in. Bulah bè hơ̆, tàm kàl prang do, ală broă lơh tuh dà tềm pềr geh lơh jăt uă làm bă tiah neh dong lơh niam đau bơta do, kơphê hòn kis niam mờ tàm tŭ trồ prang soăt soăt dà tơn.

Ồng Triệu Văn Khang ơm tàm xã Ea M’Đroh, kơnhoàl Cư Mgar, càr Dăk Lăk dê geh 2 lồ kơphê gam tàm tơngai ai sa pà gĭt, tus tơngai do, ală dà dờng, dà croh, tơnau dà, halà bơtơ̆t dơng dà neh soăt jơh dà. Mơya kơnờm bơh tàm pơdar niam ngan jăt jơnau đơs tuh dà tềm pềr, mờ dà dùl êt bơh dà tơrlung khuàng, hìu bơnhă kung gam gơtùi gàr sơl ai sươn chi in kis dờng bè ờs sơl. Ồng Triệu Văn Khang, đơs: Tiah añ do là tuh dà dơ̆ bàr, den ngui dà bơh dà tơrlung, he pal ơm kơ̆p tŭ jiơ. Ngui dà là he pal tuh dà tềm pềr, pal ơm kơ̆p tŭ jiơ, ờ gŏ lơh pơhì dà. Dilah tuh lìu tus bơdìh den geh lơh pơhì pơhà ngan dà.

Jăt ồng Nguyễn Thanh Long, Kuang ătbồ Chi cục Bơtơ̆t rbòng dà càr Dăk Lăk dê yal, trồ tơngai duh jŏ jòng tàm kàl prang gơlam tus ờ tơl dà tuh ai kơphê in là jơnau neh geh wih geh wơl tàm uă nam do tàm tiah do. Bulah bè hơ̆, bơta do gam rơhời geh lơh niam wơl bơh broă rề ơnàng lơh uă làm bă tiah ală broă lơh tuh dà tềm pềr. Ủy ban Nhân dân càr Dăk Lăk kung neh geh dong kờl ngan ngồn nàng làng bol in ƀươn ƀoài ngui măy mok tuh dà pa. Ồng Nguyễn Thanh Long, yal: Bơh bồ kàl prang tơn den bol añ neh bơto sồr làng bol là pal ngui dà tềm pềr, jơh nùs tềm pềr dà tàm ală tơnau dà dềt drơng broă tuh dà ai chi tam in. Broă tuh dà den pơlam làng bol in tuh dà tềm pềr, ờ gŏ di pơhì pơhà. Lam lơh jăt ngui tam gơl măy mok broă lơh tuh dà tềm pềr. Broă do den Ủy ban Nhân dân càr geh dong kờl 50% priă jền ai làng bol in dilah hìu bơnhă lơi tam gơl tus tuh dà tềm pềr mờ măy mok tuh dà dềt jăt ntờc.

Dăk Lăk ngui măy mok tuh dà tềm pềr dà ai kơphê in

Tơngai duh jŏ jòng lơh càr Lâm Đồng geh pơhìn gơtìp jơnau ờ tơl dà tuh mờ ro kơnrañ uă tàm bàr pe tiah. Ală hìu bơnhă làng bol neh rơcăng lài dà nàng gàr chi tam ờ gơtìp soăt dà. Mò Vũ Thị Tuyết ơm tàm xã Gia Viễn, kơnhoàl Cát Tiên, pà gĭt: Hìu bơnhă mò neh rơcăng lài lùp mờ uă làng bol tàm tiah do cribơyai gùng dà tềm pềr dà, đòm jăt broă lơh sa dùl ròt bal mờ tềm pềr dà. Mò Vũ Thị Tuyết, đơs: Lài mờ tŭ sih tam den he pal lòt tuah wàs rbòng dà gơ in wah. Hòi jà làng bol tàm ală thôn, ƀòn nàng khi lơh bal bè he sơl nàng gơ in ngan ngồn den hơ̆ sồng yuh dà, tơnơ̆ hơ̆ den hơ̆ sồng lơh kàl kòi pa.

Jăt ồng Nguyễn Trường Sơn, Phó Kuang ătbồ Phòng Nông nghiệp kơnhoàl Dà Teh, càr Lâm Đồng dê yal, bal mờ broă lam lơh dùl ròt bal ală broă lơh rơcăng sơndră mờ trồ prang soăt dà, broă đòm jăt broă lơh 2 kàl kòi- dùl kàl tơngời, tam gơl uă bă ù tam phan sa ờ geh tơl dà tuh nàng tam ală tờm chi tam jŏ nam mờ chi sa plai geh dong kơnhoàl rơcăng lài rlau tàm broă tam phan mờ sơndră wơl geh cồng nha dilah trồ prang dờng soăt dà gơlik tus. Ồng Nguyễn Trường Sơn, đơs: Gơwèt mờ broă lơh tam dră mờ trồ prang soăt dà, den Ủy ban Nhân dân kơnhoàl neh kĭ ring bal broă rơndăp lơh rơcăng sơndră trồ prang bơh gờñ ngan. Bè là tơrgùm tam gơl tus tam ală tờm chi tam geh jơnau kờñ ngui dà dùl êt nàng tềm pềr dà tuh; mơkung tơnguh tai broă lơh tam pà dà mờ lam ngui mờ lơh ală broă lơh bơtơ̆t tơnau dơng dà.       

Lâm Đồng tŭ do geh 430 nơm tơnau dơng dà, bơtơ̆t dơng dà, bơtơ̆t dơng dà lơh ing...gam lơh broă geh cồng nha. Ală bơtơ̆t tơnau dơng dà do lơh geh tơl dà tuh ai pơgăp 43 rbô lồ ù lơh broă sa sươn sre in. Bal mờ broă Lâm Đồng neh bơcri 37 tơmàn đong nàng dong làng bol tờ 3 rbô nơm tơnau dơng dà dềt, dơng dà geh 7 tơlak 500 rbô khối dà jăt Rơndăp broă lơh tờ tơnau dà dềt bơh càr dê neh pơgồp bơnah bơsong tai dà tuh ai chi tam in tàm kàl prang. Bulah bè hơ̆, tềng đăp bơta tơngai duh jŏ jòng, pơhìn ờ tơl dà tuh mờ trồ prang dờng soăt dà là uă ngan, càr Lâm Đồng gam tơrgùm sồr ală anih lơh broă geh gơnoar pơn jăt tai lam lơh jăt uă broă lơh rơcăng sơndră trồ prang soăt dà.

Quốc Học ai bơh VOV Tây Nguyên dê- Cau mblàng Lơ Mu K’Yến