VOV4.K’ho- Tềng đăp bơta gơbàn kal ke bơh kòp Covid-19 dê, gơnoar ătbồ càr mờ ală anih lơh broă geh gơnoar ală càr tàm tiah Tây Nguyên dê neh sơlơ tơnguh tai broă lơh rơcăng sơndră. Bal mờ broă lơh anih kơryan bơta bơtờp tìs mờ kơrnoat boh lam bơh tiah nhàr lơgar, ơm yah ngài bàr pe nă cau geh gơrềng tus cau kòp Covid-19, gah lơh sơnơm, gah bơto bơtê kung lam lơh ală broă lơh kơryan kòp niam ngan rlau jơh nàng kơryan bơta lơh bơtờp bơh kòp dê.

Tàm càr Kon Tum, mpồl ling sền gàr tiah nhàr lơgar neh ai tai ling klàng tus kơryan ală cau dô gan nhàr lơgar tìs mờ kơrnoat boh lam tàm 2 gơl gùng tiah nhàr lơgar rềp bal mờ lơgar Lào bal mờ Campuchia. Mùl màl, mờr 100 nă sĩ quan, ling geh griăt geh ai 8 Pôs đồng ling sền gàr tiah nhàr lơgar bơh càr Kon Tum dê in. Ồng Lê Minh Chính là Đại tá, Chính ủy Mpồl ling sền gàr tiah nhàr lơgar càr Kon Tum pà gĭt, bal mờ broă geh ai tai mpồl cau, kuang bàng mờ cau ling tàm gơl gùng tiah nhàr lơgar jòng rlau 292 kơi sồ rềp nhàr bal mờ lơgar Lào bal mờ Campuchia kung sùm dờp geh bơta sền gròi, dong kờl, pơndờm pơnđiang jơh bal bè phan bơna mờ nùs nhơm tàm ală tŭ lam lơh jăt kơnòl broă dơ̆ lĕ bal hơ̆ là ătbồ sền gàr tiah nhàr lơgar mơkung rơcăng sơndră kòp Covid-19 sơl. Ồng Lê Minh Chính, đơs: Bơdìh mờ bơta dong kờl bơh Đảng mờ Dà lơgar dê, mpồl ling sền gròi den Tỉnh ủy, Ủy ban Nhân dân càr kung bè là ală anih lơh broă neh lòt còp, pơndờm pơnđiang, dong kờl ai oh mi in ală phan ngui lơh sơnơm, ală măy mok phan ngui bè dà ngui sa, bè đèng măt tơngai nàng dong kờl dùl bơnah dong ai oh mi in iang nùs lơh broă tàm tiah nhàr lơgar. Bol añ kung lơh jăt niam sơl jơnau đơs 4 tơn dùl bă tiah. Tàm ală tiah geh dà gơhòr is den oh mi lơh jăt broă lơh sa ròng phan nàng tơnguh uă bơta bơkah dơ̆ sa ai mpồl ling in mờ gàr sùm bơta dong kờl bè tàm Pôs đồng nàng oh mi geh să jan pràn kơldang nàng lơh jăt niam kơnòl broă dơ̆ lĕ bal.

Mpồl ling sền gàr tiah nhàr lơgar mblàng yal rơcăng sơndră kòp Covid-19

Tềng đăp bơta gơbàn kal ke bơh kòp dê, Ủy ban Nhân dân càr Dăk Lăk neh sồr Chủ tịch Ủy ban Nhân dân kấp kơnhoàl, ƀòn dờng, kấp xã rơcăng lài pơgồp bal mờ ală anih lơh broă geh gơrềng sồr lơh jăt ală broă lơh kơryan ờ huan ai lơh nàng rơcăng sơndră kòp tàm ù tiah càr dê bơh 12 jiơ mang ngai 10/5/2021 tus tŭ geh jơnau yal pa. Mùl màl là bè do, ơm jơh ală broă lơh pơrjum, ală broă lơh tơrgùm gal cau rlau 30 nă tàm dùl cơldŭ lơh broă (mìng is ală Pơrjum tìp măt mờ ală cau tĕ khà lơh jăt jơnau sồr bơh Ủy ban tĕ khà càr dê); kơryan ờ huan ai broă tơrgùm gal cau bơdìh anih lơh broă, hìu bơsram, hìu sơnơm; ơm jơh ală broă lơh geh tơrgùm rlau 30 nă cau tàm ală anih pơrjum gah jăt yàng, pin dờn, duh khuai; ơm jơh ală broă lơh niam chài, tàp pràn să jan, nhơl lơh rài bồ tơngoh tàm ală anih mpồl bơtiàn; ơm bơyai lơh gơwèt mờ ală broă lơh ñô bau, lùp bao, ñô sa, sa mŭt hìu pa...gơwèt mờ iês tơ̆p ƀồc cau chơ̆t, sồr jơh làng bol bơyai lơh bal mờ broă lơh ƀalhiă, bañ tơrgùm gal cau mờ lơh jăt niam broă pơn chèu glòm muh măt, ƀồm sơnơm lơh kloh khuẩn.

Tus tơngai do, Dăk Lăk neh gŏ 2 nă cau bơtờp mờ virus Sars CoV-2, ơm bal tàm dùl nơm hìu tàm ƀòn dờng Buôn Ma Thuột. Tiah geh 2 nă cau bơtờp kòp do neh geh wàng se kơryan kòp. 1 hìu bơsram mầm non, tiah geh sau dềt F1, ơm dùl hìu bal mờ 2 nă cau bơtờp kòp, kung neh geh til mpồng nàng ƀồm sơnơm kơryan kòp. Tài bơh geh dùl nă oh dềt mầm non là F1 bơh cau kòp sồ 3237 dê, Ủy ban Nhân dân càr Dăk Lăk neh geh kơrnoat lơh nền ai ală hìu bơsram mầm non in tàm ƀòn dờng Buôn Ma Thuột ơm rlô dùl poh, nàng lơh jăt ală broă lơh rơcăng sơndră kòp. Gơrềng tus ală kơnòm bơsram ơm kis tàm tiah wàng se kơryan kòp, ồng Đoàn Ngọc Thượng Phó Chủ tịch Ủy ban Nhân dân ƀòn dờng Buôn Ma Thuột pà gĭt: Gơwèt mờ cau bơh ală sau là kơnòm bơsram tŭ do gam rơcăng mŭt tàm dơ̆ pơrlòng tơngai dơ̆ 2 bơh nam bơsram 2020- 2021 dê, den bol añ neh sồr mpồl lơh broă geh gơnoar lùp kờp tàm tiah ơm yah ngài nàng geh sră cih mat loh làng. Tơnơ̆ tŭ geh mat loh làng den bol añ ai pơrlòng bơtơl tàm tŭ dilah ală sau ờ tus bal dơ̆ pơrlòng bal bơh dơ̆ pơrlòng tơngai dơ̆ 2 nam bơsram 2020- 2021 dê.

Drim ngai 10/5, Anih tờm gròi sền kòp tê jê să càr Dăk Lăk pà gĭt neh geh cồng nha xét nghiệm dơ̆ 1 ală cau tàm tiah làng bol ơm kis gơtìp wàng se kơryan kòp gơrềng tus cau kòp sồ 3237 mờ 3334. Jăt mờ hơ̆, jơh ală cau tàm tiah wàng se kơryan kòp tàm gùng kòn sồ 189/1/25, gùng Mai Hắc Đế, sơnah ƀòn Tân Thành, ƀòn dờng Buôn Ma Thuột tàm hơ̆ geh 144 nă cau ndrờm geh cồng nha xét nghiệm ờ bơtờp dơ̆ dùl mờ virus Sars CoV-2.

Tiah ơm yah ngài tàm Dăk Lăk

Poh lài, Ủy ban Nhân dân ală càr: Dăk Nông, Lâm Đồng mờ Kon Tum neh geh sră sồr bè broă ơm ing lơh broă bàr pe broă drơng ala nàng kờñ lơh jăt niam ală broă lơh rơcăng sơndră kòp Covid-19. Jăt mờ hơ̆, bàr pe drơng broă ala kuơmàng ngan, bè: hìu bar, karaoke, tiah tam ya, jơnau nhơl điện tử geh pơhìn uă lơh bơtờp kòp Covid-19 tàm ù tiah càr sồr pal ơm ing lơh broă. Mpồl đơng lam rơcăng sơndră kòp tàm kòn bơnus bơh càr Dăk Nông dê sồr ală mpồl lơh broă geh gơnoar mờ anih lơh broă ờs mờng pơgồp bal sơlơ gròi sền kòp bơtờp tàm ală tiah mpồng nhàr lơgar, tiah nhàr lơgar. Anih lơh broă geh gơnoar sơlơ lơh tai broă lơh lòt sền, gròi sền broă lơh jăt jơnau sồr pơn chèu glòm muh măt, gàr bơta ơm yah tàm ală tiah mpồl bơtiàn, ngan là tàm ală tiah, ală anih nhơl chờ; lơh jăt broă lơh glài kràñ ală cau lơh tìs jăt jơnau sồr.

Làng bol Dăk Nông yal mờ cau lơh sơnơm in

Kung tàm poh lài, tàm tiah Tây Nguyên geh bàr pe nă cau pal ơm yah ngài tài geh gơrềng tus mờ cau kòp Covid-19. Hơ̆ là, Hìu sơnơm kơnhoàl neh lơh jăt broă lơh ai ơm yah ngài dùl nă cau F1 mờ cau kòp Covid-19 tàm càr Vĩnh Phúc mờ gam mhar tus jòi jơh ală cau ơm rêp mờ cau kòp nàng rơcăng sơndră kòp. Geh 6 nă cau ơm rềp mờ F1 tàm kơnhoàl Sa Thầy kung neh geh ai ơm yah ngài sơl nàng jăt sền. Ai tàm càr Dăk Lăk, tàm poh lài, Hìu sơnơm thị trấn Ea Pốk, kơnhoàl Cư Mgar geh dờp dùl nă cau tus yal mờ cau lơh sơnơm rê wơl bơh ƀòn dờng Đà Nẵng. Cau do geh broă ơm rềp mờ geh ală bơta gơ tơngŏ kòp Covid-19, bè bơsiă, duh să, gơ hòr dà muh...Tơnơ̆ tŭ dờp geh jơnau yal tơn, cau do neh geh ai mẫu kòp mờ pơyua tus Viện vệ sinh dịch tễ Tây Nguyên nàng xét nghiệm mờ gam ơm kơ̆p cồng nha. Tŭ do, cau do neh geh jun ai ơm yah ngài tàm khoa kòp bơtờp Hìu sơnơm kơnhoàl Cư Mgar dê.

Cau cih VOV Tây Nguyên- Cau mblàng Lơ Mu K’Yến