VOV4.K’ho- Mìng gam 2, 3 ngai tai, rlau 69 tơlak nă cau tĕ khà gùt lơgar geh lơh jat gơnoar chính trị kuơmàng mờ dờng màng ngan rlau jơh bơh làng bol dê, hơ̆ là lòt đùh sră tơn, rơ wah pồ kuang bàng geh pơn rơ jak ngan rlau jơh mut tàm Quốc hội mờ Hội đồng Nhân dân ală kấp. Tài gơ rềng bơh kòp Covid-19 dê, tus tŭ do, ală tiah ndrờm neh kờp dŭ ală rơndap broă bơyai lơh đùh sră pồ tàm tơngai rơcang sơndră kòp bơtờp. Jơnau kờñ là jơh ală cau tĕ khà ndrờm geh tus bal “Ngai chờ dà lơgar” mờ lơh jat gơnoar tĕ khà.

89 anih đùh sră tàm quận Cầu Giấy, ƀòn dờng Hà Nội tus tŭ do ndrờm geh rơcang wil tơl, gàr ờdo ờdă rơcang sơndră kòp bơtờp. Tàm ală anih tĕ khà ndrờm geh lơh gùng lòt ơnàng mờ geh jơnau pơlam mùl màl ai cau tĕ khà lòt đùh sră pồ in, gàr bơta ơm yah ngài tŭ dờp sră, cih sră mờ đùh sră pồ; pơn chèu glòm muh mat, ràu tê lơh kloh khuẩn lài mờ tŭ mờ tơnơ̆ tŭ đùh sră pồ...

Mò Trần Thị Phương Hoa, Bí thư Quận ủy, Kuang atbồ Mpồl đơng lam tĕ khà quận Cầu Giấy pà git, bơdìh mờ broă gàr ală jơnau sồr bè ờdo ờdă rơcang sơndră kòp Covid-19 tàm tŭ đùh sră pồ, quận kung kờp dŭ mùl màl gơwèt mờ tơl broă rơcang lài dilah gơlik geh kòp: “Jơnau rơcang lài nàng rơcang sơndră kòp tàm broă tĕ khà kung neh geh tơnguh tus dùl khà tai. Tŭ do ală anih tĕ khà ndrờm geh cơldŭ tam cah is. Mpồl tĕ khà geh bơto pơlam, bơdìh mờ bơto pơlam mờng chài lơh broă den gah lơh sơnơm quận geh kơnòl bơto pơlam ai ală cau tàm mpồl tĕ khà in geh tai pràn jak tàm broă lơh rơcang sơndră kòp bơtờp nàng pơlam cau tĕ khà tŭ lòt tĕ khà gàr ờdo ờdă rơcang sơndră kòp”.

Tàm jơh ală quận bơh ƀòn dờng Hà Nội dê ndrờm neh geh broă rơndap lơh rơcang sơndră kòp tàm anih tĕ khà mờ geh broă rơndap lơh is gơwèt tus mờ ală anih tam cah is, anih gơtìp wàng se. Ủy ban tĕ khà ƀòn dờng Hà Nội neh dan mờ Mpồl duh broă tĕ khà dà lơgar bè ală rơndap broă krơi is bơyai lơh tĕ khà tàm ală anih tam cah is.

Ai tàm ƀòn dờng Hồ Chí Minh, Ủy ban tĕ khà ƀòn dờng sồr rơndap tap sèng anih nggui gàr jat jơnau sồr ơm yah ngài, ờ huan tơrgùm gal cau; rơndap ai cau tus bal ờ rlau 50% bơta pràn bơh anih pơrjum bơyai lơh dê. Bơta kuơmàng là tàm càr Bắc Giang là tiah gam gơbàn uă kòp Covid-19 ngan rlau jơh gùt lơgar tŭ do kờp dŭ ờ bơyai mut lơh gal cau tàm ngai tĕ khà; tam pà dềt cau tĕ khà gơs uă dơ̆ nàng lòt đùh sră jat tŭ jơ, pleh tơrgùm gal cau...

Ồng Ngô Sách Thực, Phó Chủ tịch Ủy ban Mặt trận dà lơgar Việt Nam đơs là, tàm tơngai tŭ do, ală tiah bơyai lơh tĕ khà tàm bơta gơbàn uă kòp Covid-19 den broă đal git gơnoar, cih mat, lir mat cau tĕ khà tàm ală anih tam cah is, anih sơm kòp tơrgùm bal... pal gàr ală bơta nàng cau tĕ khà tàm ală tiah do in lam lơh jat gơnoar tĕ khà he dê: “Bol hi gŏ tŭ geh kòp halà geh broă nisơna gơlik geh den pal geh jơnau kờp dŭ lài loh làng, ală anih tam cah is pal geh thùng ơn sră pồ ntrờn làm bă tiah. Kung tàm dùl mpồl đùh sră, dùl anih đùh sră, ală anih cih mat cau tĕ khà tàm ală tiah ai thùng ơn sră pồ làm bă tiah, lơh bè lơi nàng gàr broă rơcang sơndră kòp mờ lơh jat gơnoar làng bol bơh ală anih tam cah is dê”.

Tàm Tây Nguyên, nùs nhơm ngai tĕ khà neh duh hồl ngan. Cau tĕ khà kơnòm să bè H’Sinh Bkrông, cau bơsram dờng nam dơ̆ 2, hìu bơsram Đại học Tây Nguyên, càr Dak Lak pà git, do là dơ̆ sơn rờp tus bal ngai chờ tĕ khà den tàng H’Sinh chờ hờp ngan, kơp tus ngai geh ià să pồ tàm tê, lơh jat gơnoar mờ kơnòl he dê. H’Sinh đơs: “Do là dơ̆ sơn rờp oh rơcang lòt đùh sră pồ, den tàng oh kơp gơn ngan lơh jat gơnoar làng bol he dê. Mờr tus tŭ lòt đùh sră pồ oh geh rơ wah ală cau jak chài, pơgồp bơnah chul chồl bơtàu tơnguh lơh sa mpồl bơtiàn tàm càr”.

Tỉnh đoàn Dak Lak neh bơyai lơh uă broă lơh gờm chờ tàm ală kơnhoàl, thị xã, ƀòn dờng mờ bơta tus bal bơh git nđờ rbô nă đoàn viên, ơruh pơnu tàm càr. Jat hơ̆, bơyai lơh broă lơh dong kờl is tàm ală anih tĕ khà bè: dong kờl sền gàr lơngap lơngai ờdo ờdă, gàr kloh niam anih bơyai lơh tĕ khà, gàr broă rơcang sơndră kòp Covid-19; bơyai lơh Ngai chờ cau tĕ khà kơnòm să; Cribơyai ‘Cau tĕ khà kơnòm să mờ dơ̆ tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026”.

Nàng gàr ờdo ờdă ai cau tĕ khà in tus bal “Ngai chờ dà lơgar”, Ủy ban tĕ khà dà lơgar neh sùm ai tơlik ală jơnau pơlam bè tĕ khà. Pa do ngan rlau jơh, Mpồl duh broă tĕ khà dà lơgar pơn jat tai tơngkah tàm tŭ bơyai lơh tĕ khà pal jat tàm broă bơyai lơh, khà cau tĕ khà tàm tơl anih đùh sră mờ jơnau sồr rơcang sơndră kòp Covid-19 tàm tiah he dê. Gơ wèt mờ cau tĕ khà là cau bơtờp kòp Covid-19, Chủ nhiệm Ủy ban adat boh lam bơh Quốc hội dê ồng HoàngThanh Tùng pà git: “Sơnua boh lam cih tơl nă làng bol geh gơnoar tĕ khà pal geh cih mat cau tĕ khà nàng lơh jat gơnoar tĕ khà. Den tàng cau tĕ khà là cau neh git gŏ bơtờp kòp gơtìp tam cah is tàm hìu halà tam cah is tơrgùm bal den dà lơgar kung pal gàr cau hơ̆ geh cih mat tàm mat cau tĕ khà. Do là kơnòl bơh Ủy ban Nhân dân kấp xã tiah cau hơ̆ ơm kis halà anih tam cah is gàr ală broă lơh nàng geh lơh jat gơnoar tĕ khà”.

Tŭ do, ală mpồl lơh broă, ală tiah tàm gùt lơgar gam pơn jat tai rơcang ală rơndap broă, mblàng yal tus tơl hìu bơnhă, tơl nă làng bol bè gàr jat jơnau sồr rơcang sơndră kòp tŭ lòt đùh sră mờ broă bơyai lơh tĕ khà tàm bơta gơlik geh kòp bơtờp. Jơnau kờñ kuơmàng ngan rlau jơh geh wèt tus là jơh ală cau tĕ khà bulah gam ơm tàm anih tam cah is, gam sơm kòp Covid-19, y- bác sĩ, ală mpồl gam lơh kơnòl broă... ndrờm geh lơh jat gơnoar tĕ khà. Jơh ală bơnah broă pal geh lơh jat di jơnau cih adat boh lam, gàr ờdo ờdă tàm bơta gơlik geh kal ke ngan bơh kòp Covid-19 dê.

Cau mblàng K’Duẩn