VOV4.K’ho- Tàm broă lơh kac màng he dê, Chủ tịch Hồ Chí Minh neh lời wơl uă tềl kah kir tus mờ rài công nhân mờ Ngai dunia lơh broă, 1/5. Tàm tơngai lòt jòi gùng dong klàs dà lơgar, ngai 1/5/1920, Nguyễn Ái Quốc neh tus bal dơ̆ mít tinh tơngkah kir sơnrai Ngai lơh broă dunia bal mờ mpồl Đảng viên mpồl bơtiàn lơgar Tây mờ geh jơnau cih đơs tàm dơ̆ pơrjum sồr ơm ờ pơyua cau tus ală lơgar gơtìp atbồ sò tơm. Ngai 1/5/1924, jat jơnau jà bơh Thành ủy Moscow mờ Mpồl kuang gơnoar cih bơh Dunia Cộng sản dê, Nguyễn Ái Quốc tus bal mờ đơs tàm dơ̆ mít tinh tơngkah kir sơnrai Ngai dunia lơh broă, 1/5.

Tơnơ̆ mờ tŭ Kăc màng nhai 8 geh cồng nha, dà lơgar geh lơngăp lơngai is, ngai 18 nhai 2 nam 1946, Chủ tịch Hồ Chí Minh neh kĭ kơrnoăt sồr bè ală ngai ơm rơlô satềp, tơnkah rài lài do mờ ngai chờ jăt yàng, tàm hơ̆ geh jơnau yal: Ngai 1 nhai 5 là 1 tàm ală ngai chờ mùl màl mờ công nhân, cau lơh broă gùt lơgar geh ơm rơlô 1 ngai geh dờp sa priă nhai. Bơh tŭ do, ngai 1 nhai 5 geh sền là 1 ngai tàm ală ngai chờ mùl màl pah nam bơh dà lơgar he dê. Ngai 29 nhai 4 nam 1946, Chủ tịch Hồ Chí Minh kĭ kơrnoăt sồr sồ 56 geh ai công nhân geh dờp sa priă nhai ngai ơm rơlô dunia lơh broă ngai 01 nhai 5. Ngai 01 nhai 5 nam 1946, dơ̆ sơnrờp tàm rài dà lơgar he dê, ngai dunia lơh broă ngai 1 nhai 5 geh bơyai lơh tơnkah, mờ geh bơyai pơrjum tàm Hà Nội, mờ broă tus bal bơh 200 rơbô nă làng bol lơh broă.

Cau mblàng Ndong Brawl mờ K’Duẩn