VOV4.K’ho- Mho ngai 12/11, mpồl kuang bàng bơh Bộ Y tế dê bơh Thứ trưởng ồng Nguyễn Trường Sơn lơh kuang atbồ mpồl geh dơ̆ lơh broă mờ Mpồl đơng lam rơcang sơndră kòp Covid-19 càr Dăk Lăk dê bè broă lơh dờp, sơm cau kòp in. Bơh ngai 27/4 tus tŭ do, Dăk Lăk neh git gŏ 5 rbô 872 nă cau bơtờp kòp Covid-19. Tàm 14 ngai rềp ndo, Dăk Lăk git gŏ 2 rbô 74 nă cau kòp Covid-19. Tàm hơ̆ geh 1 rbô 429 nă cau bơtờp kòp tàm mpồl bơtiàn, geh 68,9% khà cau kòp geh git gŏ. Gơwèt mờ broă lơh bơt bơtàu mờ lam lơh dờp sơm kòp: gùt càr neh lơh 6 anih sơm cau kòp Covid-19 in geh 3 rbô 222 nơm jơ nờng kòp jat broă lơh 3 cờn. Tềng đap broă gơlik geh kal ke, càr kờp dŭ geh tơnguh khà jơ nờng sơm kòp ai cau kòp Covid-19 in tus 5 rbô 580 nơm jơ nờng tàm jơh ală kấp.

Nàng lam lơh jơnau kờñ kơryan kòp Covid-19, tàm dơ̆ lơh broă, Dăk Lăk neh dan ală Bộ, Gah broă lơh, kuơmàng là Bộ Y tế dong kờl càr phan bơna, măi mok mờ ai cau lơh broă bơh ală càr nàng tus dong càr Dăk Lăk tàm broă sơm cau kòp Covid-19 in, mờ kung pà bơtơl sơnơm vaccine ai càr in nàng lam lơh cit sơnơm vaccine ai jơh ală cau geh cit bơh 18 sơnam rlau hơđang in, làng bol bơh ală tiah geh kòp rê wơl mờ kơnòm dềt bơh 12 tus 17 sơnam; dong kờl bơcri priă lơh, ai ngui 1 hìu sơnơm ing tàm cờn dơ̆ 3 nàng sơm cau kòp jroă, ngòt rơngơt in dilah sơrlèt rlau bơta pràn dờp, sơm cau kòp Covid-19 bơh càr dê.

Cau mblàng K’Duẩn