VOV4.K’ho- Tàm càr lơgar Paris, lơgar Tây, gah rơndeh par Bamboo Airways mờ Tập đoàn Safran neh bơyai lơh kĭ Sră cih kah lơh broă bal tềng đap bơta sền gŏ bơh Thủ tướng Việt Nam ồng Phạm Minh Chính mờ Thủ tướng lơgar Tây ồng Jean Castex dê.

Broă do gơ ơm tàm ròt ală broă lơh bơh dơ̆ lòt còp ngan ngồn lơgar Tây bơh ngai 03 tus ngai 05/11 bơh Thủ tướng Chính phủ ồng Phạm Minh Chính dê. Tàm dơ̆ kĭ jơnau ring bal, gah rơndeh par Bamboo Airways mờ Safran- là Tập đoàn khà dùl dunia tàm gah kỹ thuật gùng rơndeh par neh bơyai lơh kĭ sră cih kah lơh broă bal bè rơ wah măi mok mờ ală phan bơna rơndeh par ai sră cih mat blơi 50 nơm rơndeh par A321NEO mờ 30 nơm rơndeh par Boeing 787-9 bơh Bamboo Airways dê. Kờp priă ală jơnau ring bal tàm Sră cih kah lơh broă bal kờp dŭ là 2 tơmàn Euro.

Ngan ngồn bơt bơtàu git gơp lơh broă bal jŏ jòng mờ Việt Nam bơh nam 2013, tus tŭ do, Tây mờ Việt Nam geh git gơp lơh broă bal jơh nùs, lơh bal bơtàu tơnguh bal tàm uă gah. Tàm gah gùng rơndeh par drơng rài kis làng bol, Việt Nam mờ Tây geh git gơp ờs mờng, tơrgùm jơh ală bơta. Cục gùng rơndeh par Việt Nam mờ Tổng cục gùng rơndeh par drơng rài kis làng bol lơgar Tây neh kĭ jơnau ring bal lơh broă bal kỹ thuật.

Cau mblàng K’Duẩn