VOV4.K’ho - Mho òr (28/06), tàm Hìu Quốc hội, Chủ tịch Quốc hội ồng Vương Đình Huệ neh cri bơyai mờ Tổng Bí thư, Chủ tịch lơgar Lào ồng Thongloun Sisoulith.

Tổng Bí thư, Chủ tịch lơgar Lào ồng Thongloun Sisoulith mờ Chủ tịch Quốc hội lơgar Việt Nam ồng Vương Đình Huệ ndrờm đơs là, dơ̆ tus còp bơh Tổng Bí thư, Chủ tịch lơgar Lào là cơng tàng niam bơh broă lơh gĭt gơ̆p kuơ màng, tam klăc bal mờ lơh broă bal tơl ală bơta đah lơgar Việt Nam mờ lơgar Lào. Tềng đăp mờ bơta kòp Covid-19 gam gơtìp kal ke tàm tiah do, lơgar Việt Nam đơs niam ală broă sơndră mờ kòp gơtờp geh cồng nha mờ dà lơgar Lào neh mờ gam lơh jăt, đơs tờm, dà lơgar Lào gờñ sền gròi kòp gơtờp, pơn jăt tai lơh geh cồng nha Nghị quyết pơrjum dờng dơ̆ 11 Đảng Nhân dân kăc màng lơgar Lào.

Tổng Bí thư, Chủ tịch lơgar Lào ồng Thongloun Sisoulith đơs tờm, tơngai tus, Quốc hội bàr lơgar pal pơn jăt tai chồl pràn broă cri bơyai, tơnguh broă lơh bal, tam pà bal broă mờng chài, tàm hơ̆ uă ngan là tàm broă bơ̆t bơtàu thể chế, broă lơh adăt boh lam mờ sền gròi uă ngan broă lơh bơh ală anih lơh broă Dà lơgar; tơnguh rơlao tai broă pơgồp bal bơh ală Ủy ban bơh bàr Quốc hội tàm broă sền gròi broă lơh jăt ală jơnau ring bal lơh broă bal đah bàr lơgar.

Mho ngai 28/6, tàm hìu lơh broă Chính phủ, ồng Phạm Minh Chính- Thủ tướng Chính phủ neh tìp mat cribơyai mờ Tổng Bí thư, Chủ tịch lơgar Lào ồng Thongloun Sisulith gam còp gĭt gơ̆p lơh bơyô bal ngan ngồn lơgar Việt Nam.

Tổng Bí thư, Chủ tịch lơgar Lào ồng Thongloun Sisulith tơngŏ bơta chờ hờp tus  còp wơl lơgar Việt Nam tàm gơnoar broă pa, gờm chờ ală cồng nha dờng màng, tơl làm bơh làng bol Việt Nam oh mi dê neh lơh geh tàm broă bơtàu tơnguh lơh sa- mpồl bơtiàn mờ mut gơ rờm bal mờ dunia tàm ală nam pa do. Bàr Kuang đơng lam bồ cribơyai ală bơta mờ đơs niam ngan ală broă lơh sơndră kòp Covid-19 tàm tơl lơgar tàm tơngai pa do. Bulah gơrềng bơh kòp Covid-19, 2 gah neh lơh ngan gàr sùm cribơyai mpồl mờ tìp mat kuang bàng kấp dờng màng, lơh jat niam geh cồng nha ală broă lơh lơh broă bal đah 2 gah tàm ală kấp; lơh broă bal tàm gah  sền gàr lơngap lơngai, sền gàr dà lơgar, lơh sa, tàm tơrƀŏ bal gùng lòt, bơto bơtê, lơh broă bal đah ală tiah pơn jat tai bơtàu tơnguh; priă lơh geh kă bro 2 gah 5 nhai bồ nam 2021 lơh geh 570 tơlak 700 rơbô dolar Mỹ, gơguh mờr 40% pơndrờm bal dùl tŭ mờ nam 2020; Việt Nam geh 280 rơndap broă lơh bơcri priă lơh tàm lơgar Lào gam geh mut lơh ngan ngồn mờ kờp jơh priă mut lơh là 5 tơmàn 160 tơlak dolar Mỹ.

Cau mblàng Ndong Brawl- K'Hạnh