VOV4.K’ho- Mho ngai 10/5, ồng Phạm Minh Chính Thủ tướng Chính phủ đơng lam dơ̆ pơrjum đah Thường vụ Chính phủ mờ Mpồl đơng lam dà lơgar rcang sơndră kòp Covid-19 nàng cribơyai ală broă lơh bơsong tơn ală bơta ờ hềt niam, mơkung ai tơlik ală gùng dà broă lơh pràn rlau tai tàm broă lơh rcang sơndră kòp Covid-19.

 Thủ tướng Chính phủ ồng Phạm Minh Chính

Ală jơnau đơs tàm dơ̆ pơrjum ndrờm đơs ngan bè sền bal là bol he gam sền gròi jai bơta kòp. Bulah dơ̆ bơtờp kòp dơ̆ do geh bơta bơtờp mhar rlau, uă rlau, kal ke rlau, kal ke sền gròi rlau, gơrềng uă rlau. Mơya dilah bol he ờ pơn jat tai geh ală gùng dà broă lơh sơr băc mhar, kràñ cê, pràn kơl dang, dilah gam geh bơta sền ờ sơ̆p, ờ rcang sền ngăc halà kơ̆p kơnờm, kơldìng wơl den bol he geh pal kong jơnau gơ lời wơl ờ gơtùi gĭt lài, mờ pal tơm kơn jơ̆ kơn jŭt ngan. Den tàng bè hơ̆, Thủ tướng tơngkah wơl jơnau sồr pal lơh jat geh cồng nha mờ bơta mờng chài tàm broă rcang sơndră kòp lài do dê, bañ rơngòt, pal ngăc ngar, jat sền bơta ngan ngồn gơlik geh, rcang lài, lơh ngan, kràñ cê geh cồng nha ală broă lơh di pal, jat jơnau sồr bơh Ban Bí thư, Chính phủ, Thủ tướng Chính phủ mờ Mpồl atbồ Mpồl đơng lam dà lơgar dê.

Cau mblàng K’ Hạnh