VOV4.K’ho- Đơs tàm dơ̆ pơrjum pờ tơn tàm jơh gùt lơgar Mpồl đơng lam dà lơgar mờ Mpồl đơng lam 63 càr, ƀòn dờng nàng sền swì cồng nha bơh sơnrờp broă lơh rơcăng sơndră kòp Covid-19 tàm dơ̆ bơtờp kòp dơ̆ 4 mờ bơyai ală kơnòl broă, broă lơh rơcăng sơndră mờ kòp, bơtàu tơnguh wơl lơh sa- kă bro tàm tơngai tus geh lơh tàm drim ngai 17/10, Thủ tướng Chính phủ ồng Phạm Minh Chính- Kuang ătbồ Mpồl đơng lam dà lơgar rơcăng sơndră kòp Covid-19 đơs sùm, pal lơh geh bơta ring bal, dùl nùs bal tàm tŭ đơng lam, sồr lơh, đơng pơlam, lam lơh jăt ală broă lơh, kơrnoat, jơnau sồr tàm broă rơcăng sơndră kòp nàng ring bal tàm jơh gùt lơgar, kấp hơđơm pal duh rơngòt kấp hơđang; kấp hơđơm ờ gŏ di ai lơh jăt jơnau sồr tìs mờ jơnau sồr bơh kấp hơđang dê.

Ngai 11/10, Chính phủ neh ai lơh jăt Kơrnoat sồ 128 bè Cih ing “Gơrờm bal ờdo ờdă, ngac ngar, kơryan geh cồng nha kòp Covid-19”. Tŭ do, uă càr, ƀòn dờng neh ờ huan lơh kràñ tai jơnau sồr ơm yah ngài mpồl bơtiàn, tam gơl rơhời tus gơrờm ờdo ờdă, ngăc ngar, kơryan geh cồng nha kòp Covid-19. Tàm dơ̆ pơrjum do, Mpồl đơng lam dà lơgar mờ Mpồl đơng lam ală càr, ƀòn dờng geh kờp sền wơl tơnơ̆ dùl poh lơh jăt Kơrnoat sồ 128 bơh Chính phủ dê. Kuơmàng, sền swì ală bơta gam gơkòl tàm jơnau sồr, ngan là ală bơta gơkờl tàm ală tŭ lam lơh jăt nàng geh bơta tam gơl di tŭ, pal lơh geh bơta ring bal bơh dà lơgar tus ƀòn lơgar.

Cau mblàng Lơ Mu K’Yến