VOV4.K’ho- Mho ngai 15/9, ồng Phạm Minh Chính- Thủ tướng Chính phủ đơng lam pơrjum gùt lơgar “Mpồl cau geh bồ tơngoh jak Khoa học mờ Công nghệ Việt Nam lam lơh jat Nghị quyết Pơrjum dờng dơ̆ 13 bơh Đảng dê”.

Thủ tướng jờng rơ bơta tă pơgồp bal dờng ngan bơh mpồl cau geh bồ tơngoh jak Khoa học mờ Công nghệ dê

Đơs tàm dơ̆ pơrjum, ồng Phạm Minh Chính ala mat Kuang đơng lam bồ Đảng, Dà lơgar, jờng rơ mờ ưn ngài ală bơta tă pơgồp, tă pơgồp dà kơl hề dờng ngan bơh mpồl cau geh bồ tơngoh jak Khoa học mờ Công nghệ dê bơh uă rơnàng ală cau khoa học dà lơgar, bơh Mpồl tam klăc ală Mpồl Khoa học mờ Kỹ thuật Việt Nam dê. Mờr tus, ală bơta tàm dunia pơn jat tai gơlik geh kal ke, kòp dờng Covid-19 digơlan pơn jat tai gơrềng ờ niam mờ ờ niam ngan tus lơh sa tàm dunia mờ tàm tiah do dê, tàm hơ̆ geh lơgar he. Thủ tướng sồr: “Bol he pal geh nùs nhơm lơh uă ngan rlau tai, pơđơl pràn lơh ngan uă rlau tai, tam klăc bal pràn rlau tai nàng lơh ngan lơh jat geh cồng nha Nghị quyết Pơrjum dờng dơ̆ 13 bơh Đảng dê. Bal mờ gơnoar broă là mpồl ala mat ai cau geh bồ tơngoh jak Khoa học mờ Công nghệ, Mpồl tam klăc ală Mpồl khoa học mờ Kỹ thuật Việt Nam mờ ală cau lơh broă tàm mpồl kờñ pal lơh niam rlau tai gơnoar broă là cau tờm ngan tàm broă lơh chính trị, bơt bơtàu mpồl tam klăc dờng nàng pơgồp bơnah lơh geh cồng nha ală jơnau kờñ chính trị bơh dà lơgar dê tàm tơngai pa”.

Cau mblàng K’Hạnh