VOV4.K’ho- Di nhai lơh broă tài kơnòm dềt nam 2021, Thủ tướng Chính phủ neh kĭ Kơrnuat sồ 830 ngai 01/6/2021 ring bal Broă lơh sền gàr mờ dong kờl kơnòm dềt tìp mat niam bơnĕ, bơceh pa tàm internet tơngai bơh nam 2021 tus nam 2025. Do là dơ̆ sơn rờp Việt Nam ai tơlik dùl broă lơh tàm kấp dà lơgar is bè broă sền gàr kơnòm dềt tàm internet. Broă lơh geh jơnau kờñ dơ̆ lĕ bal, geh: Sền gàr jơnau ndơp ndơr rài kis is mờ kơryan, lơh glài ală broă sơmờm internet nàng sơgràm aniai kơnòm dềt, tàm hơ̆ sền gròi tus broă bơto ală kơnòm dềt in jơnau git wă, bơta chài di pal jat tơl sơnam (gam hòi là hệ miễn dịch số) nàng kơnòm dềt in git is mờ geh bơta chài sền gàr is să tờm tàm internet. Jơnau kờñ dơ̆ 2, broă lơh gàr sùm dùl tiah ơm kis niam bơnĕ, bơtàu tơnguh ală bơta phan bơna, ală phan ngui Việt Nam nàng kơnòm dềt in bơsram, tơrbŏ bal, nhơl ñŏ dùl bă bơceh pa.

Cau mblàng K’Duẩn