VOV4.K’ho - Ngai do, jăt jơ lơgar Việt Nam (22/11), Thủ tướng Chính phủ ồng Phạm Minh Chính bal mờ mpồl kuang bàng dờng màng lơgar he neh lòt gùng còp mùl màl lơgar Nhờk jăt jơnau jà bơh Thủ tướng lơgar Nhờk ồng Fumio Kishida.

            Thủ tướng Chính phủ ồng Phạm Minh Chính bal mờ Thủ tướng lơgar Nhờk ồng Fumio Kishida

Dơ̆ tus còp mùl màl lơgar Nhờk sơnrờp ngan bơh Thủ tướng ồng Phạm Minh Chính geh bơyai lơh tàm bơta broă lơh git gơ̆p đah bàr lơgar gam tàm tơngai niam bơnĕ ngan bơh lài tus tŭ do, bơh tŭ crơng gơs broă lơh bal mờ lơgar ndai, geh broă pin dờn bal uă. Dơ̆ tus còp là broă lơh jăt gùng dà lơh broă bal mờ lơgar ndai krơi is, lơh tờm, tài bơta ring lơngai, git gơ̆p, lơh broă bal mờ tơnguh bơtàu neh geh ai tơngŏ tàm pơrjum dờng Đảng gùt lơgar dơ̆ 13. Lơgar Việt Nam sùm là bơyô, lơh broă bal đềt mềr, pin dờn lơgar Nhờk dê mờ kờñ lơgar Nhờk tơnguh gơnoar di pal tàm tiah do mờ tàm dunia, bal mờ lơgar Nhờk pơgồp bal tàm broă geh sùm bơta ring lơngai, ring niam, lơh broă bal mờ tơnguh bơtàu tàm tiah do. Lơgar Việt Nam tŭ lơi kung rơcang bal mờ lơgar Nhờk pờ geh tơngai tơnguh bơtàu pa, mùl màl, geh cồng nha rơlao tàm ală gah broă, tàm hơ̆ uă ngan là bè lơh sa, bơta lơngăp lơngai dà lơgar, kơnhoàl ù tiah, tìp bal làng bol.

Cau mblàng Ndong Brawl