VOV4.K’ho- Ngai òr (08/10), tàm hìu lơh broă Chính phủ, Thủ tướng Chính phủ ồng Phạm Minh Chính neh geh dơ̆ cri bơyai tàm điện thoại mờ Kuang dong broă Kuang atbồ lơgar Mỹ bè tam gơl trồ tiah ồng John Kerry. Bàr gah ring bal sền wơl broă lơh git gơ̆p, lơh broă bal đah lơgar Việt Nam mờ lơgar Mỹ tơnơ̆ mờ rơlao 25 nam pơn jăt tai tơnguh bơtàu niam, tàm hơ̆ geh lơh broă bal lơh sa- kă bro, lơh broă bal tơnguh bơtàu kơl jăp là broă tờm mờ lơh broă bal năng lượng kloh, lơh wơl là tiah àng, bơta pràn pa.

Di tàm dơ̆ do, ala măt Chính phủ mờ làng bol lơgar Việt Nam, Thủ tướng Chính phủ ồng Phạm Minh Chính kung tơlik nùs nhơm ưn ngài gơwèt mờ Chính phủ bal mờ làng bol lơgar Mỹ neh dong kờl sơnơm vaccine mờ phan lơh sơnơm ai lơgar Việt Nam in nàng rơcang sơndră mờ kòp Covid-19 tàm tơngai do. Thủ tướng Chính phủ ồng Phạm Minh Chính đơs niam broă lơh ngan bơh gơnoar atbồ bơh Kuang atbồ lơgar Mỹ ồng Joe Biden dê chồl pràn ală broă lơh broă bal gùt plai ù nàng rơcang sơndră mờ dơ̆ tung lơtang trồ tiah.

Do là broă gùt plai ù den tàng pal geh tus bal bơh gùt plai ù dê. Thủ tướng Chính phủ đơs, bŭ lah broă tam gơl lơh sa tơlir gam tìp uă kal ke, lơgar Việt Nam pơn jăt tai hơ geh lơh pràn kơl dang broă rơcang sơndră mờ tam gơl trồ tiah. Thủ tướng kung hòi jà lơgar Mỹ pơn jăt tai tơnguh broă dong kờl lơgar Việt Nam bơsong hoàc huơr gơlời wơl tơnơ̆ rài tam lơh, tàm hơ̆ uă ngan là lơh kloh sơnơm dioxin, bơh tŭ hơ̆ geh pơgồp bal tàm broă lơh kloh tiah ơm kis mờ tơnguh bơtàu kơl jăp tàm lơgar Việt Nam.

Cau mblàng Ndong Brawl