VOV4.K’ho - Mho òr (12/07), Thủ tướng Chính phủ ồng Phạm Minh Chính neh cri bơyai tàm điện thoại mờ Thủ tướng lơgar Israel ồng Naftali Bennett.Thủ tướng ồng Naftali Bennett đơs niam ală cồng nha bơh lơgar Việt Nam tàm tơngai do tàm broă sơndră mờ kòp Covid-19, kung bè tàm broă tơnguh bơtàu lơh sa mpồl bơtiàn mờ lơh broă bal mờ lơgar ndai. Ồng đơs lơgar Israel sền kuơ broă chồl pràn rơlao tai gĭt gơ̆p lơh broă bal uă bơta mờ lơgar Việt Nam.

Thủ tướng Chính phủ ồng Phạm Minh Chính chờ gờm ồng Naftali Bennett geh pồ lơh Thủ tướng lơgar Israel. Tàm bơta tam gơl jơi pa lơh kòp Covid-19 ngai sơlơ kal ke, Thủ tướng ồng Phạm Minh Chính kơ̆p kờñ bàr gah geh pơgồp bal nền nòn tàm broă tam dră mờ kòp Covid-19. Bàr Thủ tướng ring bal là tŭ lơi kung rơcang lơh broă bal nền nòn nàng ai broă lơh bal gĭt gơ̆p lơh broă bal bơh bàr lơgar dê ngai sơlơ mùl màl, geh cồng nha; chồl mhar broă cri bơyai, kĭ hơ bal Hiệp định kă bro khăt gơboh mờ Hiệp định lơh broă bal đah  bàr lơgar; ai geh khà uă rơlao, lơh ngan gơguh bơcri priă, kă bro bàr đah, wèt tus tơnguh bơtàu wơl kơl jăp tơnơ̆ mờ kòp gơtờp.

Cau mblàng Ndong Brawl