VOV4.K’ho - Thủ tướng Chính phủ ồng Phạm Minh Chính neh cri bơyai tàm điện thoại mờ Thủ tướng lơgar Séc ồng Andrej Babis nàng cri bơyai bè broă lơh gĭt gơ̆p bal đah bàr lơgar, ai uă tơngai nàng cri bơyai ală broă lơh broă bal tàm broă rơcang sơndră mờ kòp Covid-19.

Thủ tướng ồng Phạm Minh Chính neh ưn ngài Thủ tướng lơgar Séc ồng Andrej Babis mờ Chính phủ lơgar Séc neh pà lơgar Việt Nam 250 rơbô ding sơnơm vaccine rơcang sơndră mờ kòp Covid-19, mờ đơs tờm do là broă dong kờl di tŭ, kuơ màng, tơlĭk broă lơh gĭp gơ̆p, lơh bơyô ờs mờng niam bơnĕ ngan đah bàr lơgar dê. Thủ tướng hòi jà Chính phủ lơgar Séc ai lài lơgar Việt Nam in khà sơnơm vaccine ờ hềt ngui bơh lơgar Séc dê, dong kờl lơgar Việt Nam geh ală anih lơh sơnơm vaccine ndai uăngan, gờñ ngan di lah gơtùi; kung bè dong kờl ală phan lơh broă, phan lơh sơnơm. Bàr Thủ tướng cri bơyai uă broă chồl pràn broă lơh gĭt gơ̆p, lơh bơyô bal ờs mờng mờ lơh broă bal uă bơta đah lơgar Việt Nam mờ lơgar Séc tơnguh bơtàu tus khà jơnhoa pa, geh cồng nha rơlao tàm tơngai tus.

Cau mblàng Ndong Brawl