VOV4.K’ho- Tàm dơ̆ cribơyai tàm điện thoại mờ ồng Tedros Adhanom Ghebreyesus, Kuang atbồ dờng Mpồl lơh sơnơm dunia (WHO) mho ngai 24/6, ồng Phạm Minh Chính thủ tướng Chính phủ tơngŏ bơta ưn ngài mờ jờng rơ ngan bơta gĭt gơ̆p lơh broă bal mờ ală bơta dong kờl dờng màng bơh WHO dê gơwèt mờ bơta bơtàu tơnguh bơh gah lơh sơnơm Việt Nam dê tàm sùm 45 nam do.

                     Thủ tướng Chính phủ ồngPhạm Minh Chính tàm dơ̆ cribơyai tàm điện thoại

Tềng đap bơta kòp gơlik geh kal ke tàm bàr pe càr, ƀòn dờng bơh Việt Nam dê tŭ do tài bơh virus jơi tam gơl să pa dê, Thủ tướng sồr WHO dong kờl mờ ai lài nàng Việt Nam in gờñ dờp geh ală bơnah sơnơm vaccine pơn jat tai bơh broă lơh Covax neh hơ pơrgon, đơs nền geh lam lơh broă lơh jŏ jòng cĭt sơnơm geh cồng nha, di tŭ mờ ờdo ờdă. Mờ Thủ tướng Chính phủ kung sồr WHO dong kờl Việt Nam gơ gơs là dùl tàm ală anih tờm lơh gơlik sơnơm vaccine ai tiah đah mat tơngai mut Thái Bình Dương in; đơs nền bơta pràn bơh gah lơh sơnơm Việt Nam dê kung bè bơta ƀuơn mờ pràn jak bơh bàr pe mpồl lơh sa kă bro Việt Nam dê digơlan lơh gơlik geh sơnơm vaccine di pal mờ tơl khà dunia. Thủ tướng jờng rơ jơnau đơs bơh  Kuang atbồ dờng bè broă ai Kuang bàng jak chài WHO dê dong kờl Việt Nam tàm broă lơh do.

Cau mblàng K’Hạnh