VOV4.K’ho- Ngai 03/6, tàm hìu lơh broă Chính phủ, tềng đap bơta đơng lam bơh Thủ tướng Phạm Minh Chính dê, Chính phủ neh pơrjum ờs mờng nhai 5 nam 2021. Tàm dơ̆ pơrjum, Chính phủ neh iat jơnau yal mờ cribơyai bè broă lơh rơcang sơndră kòp Covid-19; sền sơ wì broă lơh sa- mpồl bơtiàn, kes priă dà lơgar nhai 5 mờ 5 nhai nam 2021; đơs lài broă lơh sa- mpồl bơtiàn, kes priă dà lơgar 6 nhai bồ nam 2021 mờ ală broă lơh tàm 6 nhai lồi nam 2021; sền sơwì cồng nha lam lơh broă rơndap lơh bơcri priă dà lơgar di mơ tơngai bơh nam 2016 tus nam 2020 mờ kờp dŭ lài Broă rơndap lơh bơcri priă dà lơgar di mơ tơngai bơh nam 2021 tus nam 2025.

Đơs mut pơrjum, Thủ tướng Phạm Minh Chính đơs nền, dơ̆ pơrjum Chính phủ ờs mờng nhai 5 geh lơh tàm tŭ tơngai kòp Covid-19 gơlik geh kal ke, broă bơtờp kòp uă rlau, mhar rlau, jơi virus ngòt rơngơt rlau mờ bơtờp tàm ală anih lơh sa mờ măi mok, broă lơh gah jat yàng. Thủ tướng sồr ală kuang bàng tus bal pơrjum tơrgùm cribơyai ală broă jat nùs nhơm kơlôi sơnơng ngan, lơh ngan, geh cồng nha ngan; làng bol lơh jat ngan. Bơh hơ̆ sền sơ wì di broă gơlik geh, ai tơlik ală broă lơh lam lơh geh cồng nha ală kơnòl broă tàm tơngai tus.

Cau mblàng K’Duẩn