VOV4.K’ho- Mho òr, tàm hìu lơh broă Chính phủ, Thủ tướng Chính phủ ồng Phạm Minh Chính neh đơng lam pơrjum pờ tơlĭk tàm internet Chính phủ mờ ală càr, ƀòn dờng bè broă sền wơl broă lơh sa mpồl bơtiàn 6 nhai bồ nam mờ gùng dà, kơnòl broă lơh 6 nhai lồi nam 2021, nàng gàr niam broă lơh jăt tơngu me dơ̆ lĕ bal sơndră mờ kòp mờ tơnguh bơtàu broă lơh sa mpồl bơtiàn.

Đơs tàm dơ̆ sơn đờm pơrjum, Thủ tướng ồng Phạm Minh Chính sồr, ală kuang bàng tơrgùm niam, đơs song tàm broă lơh nàng ai geh ală kơnòl, broă lơh, tơngu me geh ai pal. Mờ nùs nhơm là sơlơ kal ke, gơsồr uă sơlơ pal tơnguh broă lơh tờm, gàr niam kơrnoăt, hòi jà bơta ngăc ngar mpồl, tàm tơngu me hơ̆ geh ai tàm bơta mùl màl tŭ do ai geh ală tơngu me, kơnòl, broă lơh di pal, nàng bơyai lơh bè lơi geh cồng nha.

Tơnơ̆ mờ tŭ neh iăt rơndăp broă cih jơnau yal sền wơl broă lơh sa mpồl bơtiàn 6 nhai bồ nam mờ gùng dà broă lơh, kơnòl broă lơh 6 nhai lồi nam 2021, ală kuang bàng neh cri bơyai nàng gĭt bè ală cồng nha neh lơh geh, ală kal ke, broă lơh gam ờ pràn pal tơmù mờ ală jơnau bơsram broă mờng chài. Bè gùng dà, kơnòl broă lơh tàm tơngai tus, Thủ tướng đơs tờm, lơh ngan, lơh sùm jăt tơngu me dơ̆ lĕ bal mờ 2 broă lơh gơguh lơh sa bơh 6% tus 6,5%.

Cau mblàng Lơ Mu K’Yến