VOV4.K’ho - Drim òr (08/07), tềng đăp mờ bơta jal mhar, kal ke bơh kòp Covid-19 tàm ƀòn dờng Hồ Chí Minh, tơnơ̆ mờ tŭ ring bal mờ jơnau dan bơh ƀòn dờng do dê geh ngui chỉ thị sồ 16, Thủ tướng Chính phủ ồng Phạm Minh Chính neh đơng lam pơrjum pờ tơlĭk tàm internet Chính phủ mờ kuang đơng lam ƀòn dờng Hồ Chí Minh nàng cri bơyai, ring bal jơnau gĭt, jơnau kờñ, broă lơh mờ hòi jà làng bol kis tàm ƀòn dờng tus bal mờ ală mpồl lơh broă chính trị nàng bơyai lơh rơcang sơndră mờ kòp Covid-19 geh cồng nha.

Thủ tướng Chính phủ ồng Phạm Minh Chính đơng lam pơrjum pờ tơlĭk tàm internet chính phủ mờ kuang đơng lam ƀòn dờng Hồ Chí Minh bè broă rơcang sơndră mờ kòp gơtờp

Thủ tướng đơs niam broă lơh ngan bơh ƀòn dờng Hồ Chí Minh dê, broă đơng lam, lam sồr bơh cấp ủy, gơnoar atbồ ală cấp. Mơya tus tŭ do kòp Covid-19 tàm ƀòn dờng do gam kal ke, ờ gĭt lài, kal ke sền gròi. Jăt jơnau dan bơh ƀòn dờng, Thường trực Chính phủ, Thủ tướng Chính phủ neh ring bal mờ kơrnoăt ngui broă lơh pràn rơlao, lơh jăt Chỉ thị sồ 16 tam cah ngài ƀòn dờng Hồ Chí Minh tàm 15 ngai nàng kơrian, sơndră mờ kòp tàm ƀòn dờng Hồ Chí Minh.

Thủ tướng đơs tờm, lơh jăt broă tam cah ngài mpồl bơtiàn mơya pal lơh bè lơi rài kis làng bol ờ gơtìp tam gơl, gàr niam bơta lơngăp lơngai, ai bơta pràn kơl dang să jan, màng kis bơh làng bol rơlao jơh. Ai lài broă rơcang sơndră mờ kòp Covid-19, ai lài broă tam pà sơnơm vaccine ƀòn dờng Hồ Chí Minh in.

Cau mblàng Ndong Brawl