VOV4.K’ho - Ngai òr (19/08), Thủ tướng Chính phủ ồng Phạm Minh Chính đơng lam pơrjum pờ tơlĭk tàm internet gùt lơgar bè lơh rơndăp broă. Thủ tướng sồr ală Bí thư, Chủ tịch UBND ală càr gam lơh jăt broă tam cah ngài mpồl bơtiàn den pơn jăt tai lơh jăt nền nòn, ală càr lơi ờ lơh jăt broă tam cah ngài mpồl bơtiàn den dong kờl cau ai ală càr đah jum in, tàm hơ̆ uă ngan là tơnguh uă jơnau gĭt wă broă lơh bè hồi sức cấp cứu.

                                            Anih pơrjum geh pờ tơlĭk bơh tàm hìu lơh broă Chính phủ

Thủ tướng hòi jà ală tiah tơnguh uă nùs nhơm “dong kờl bal”; pơn jờng ală càr dong kờl phan bơna ai ală càr, ƀòn dờng hờ đah jum in. Đơs pơn dŭt pơrjum, Thủ tướng ồng Phạm Minh Chính sồr ală bộ, gah lơh broă dà lơgar pơn jăt tai iăt ală jơnau đơs bơh ală càr kung bè iăt ală bộ, gah lơh broă dà lơgar đơs nàng pơgồp bal lơh rơndăp broă. Broă lơh rơndăp broă pal geh lơh lài, rơndăp broă tơrgùm bal, mùl màl jơh adăt rơndăp broă bơh Quốc hội, di pal mờ bơta geh, bơta kuơ tàm pơrlòng bơh ală tiah dê, bộ, gah lơh broă dê, anih lơh broă, mpồl lơh broă dê nàng tơnguh bơtàu kơl jăp. Geh rơndăp broă niam hơ̆ sồng geh rơndăp broă lơh niam, geh cau bơcri priă niam, ngui niam khà priă bơcri dà lơgar, tơnguh bơtàu lơh sa mpồl bơtiàn geh cồng nha.

Cau mblàng Ndong Brawl