VOV4.K’ho - Mho òr (01/11), tàm lơgar Anh, Thủ tướng Chính phủ ồng Phạm Minh Chính neh tus bal mờ geh jơnau đơs kuơ màng tàm ngai sơnrờp bơh Pơrjum dờng trồ tiah geh bơyai lơh tàm Pơrjum dơ̆ 26 ală gah tus bal Công ước bơh Liên hợp quốc dê bè tam gơl trồ tiah (COP26).

                            Thủ tướng Chính phủ ồng Phạm Minh Chính đơs tàm Pơrjum Dờng trồ tiah

Thủ tướng đơs tờm broă rơcang sơndră mờ tam gơl trồ tiah, tơnguh wơl bơta geh is pal gơs broă ai lài uă ngan tàm ală broă tơnguh bơtàu, là khà niam nùs nhơm uă ngan bơh ală cấp, ală gah lơh broă, ală mpồl lơh sa kă bro mờ làng bol dê. Thủ tướng kung đơs là, ală broă lơh pa, geh ai bơh bơta geh is mờ ai làng bol lơh tờm, ờ lời cau lơi gơtìp sơbì is hờ tơnơ̆. Tơn jơh jơnau đơs, Thủ tướng đơs tờm lơgar Việt Nam gam lơh ngan jơh pràn nàng geh rơcang sơndră mờ tam gơl trồ tiah, mờ tơnguh bơtàu broă lơh sa nàng gơguh pràn, gàr niam rài kis ngai sơlơ niam rơlao ai làng bol in. Lơgar Việt Nam kơ̆p kờñ tơnguh broă lơh bal mờ mpồl bơtiàn dunia tàm ală broă lơh, rơndăp broă bơcri priă mờ tơnguh bơtàu kơl jăp tàm tơngai tus.

Cau mblàng Ndong Brawl