VOV4.K’ho- Đơs tàm dơ̆ lơh broă mờ ală cau khoa học, ală mpồl lơh broă, mpồl lơh sa kă bro tus bal tàm jàu công nghệ, kơlôi sơnơng, lơh gơlik sơnơm vaccine rcang sơndră kòp Covid-19 nàng pơn jat tai tă bơsong bơta kal ke, kòl yan, tơnguh broă lơh do geh bơyai lơh tàm ngai 12/8, tàm hìu lơh broă Chính phủ, ồng Phạm Minh Chính - Thủ tướng Chính phủ sồr, jơh ală anih lơh broă, tơl nă cau dùl nă să is geh kơnòl pal jơh nùs lơh ngan, pơn đơl pràn lơh ngan, lơh ngan uă rlau tai, pơgồp bal niam, geh cồng nha rlau tai tài jơnau kờñ geh vaccine lơh gơlik tàm lơgar gờñ ngan rlau jơh.

Đơs sơnrờp tàm dơ̆ pơrjum, ồng Phạm Minh Chính đơs loh, Chính phủ, Thủ tướng Chính phủ, Mpồl đơng lam dà lơgar neh sồr kràñ cê lơh ngan, làng bol jơh nùs sền gròi ngan broă lam lơh broă lơh jŏ jòng vaccine. Thủ tướng đơs ngan, “pal cribơyai mờ pal lơh gơtùi” broă lơh gơlik vaccine tàm lơgar. Tàm dơ̆ lơh broă, ală Kuang bàng kung kờñ uă ngan nùs nhơm bơh Thủ tướng Chính phủ ồng Phạm Minh Chính dê là pal ring bal mờ jơh ală bơta vaccine, “bơta vaccine niam ngan rlau jơh là vaccine geh ai gơnoar, geh cĭt gờñ ngan rlau jơh, mhar ngan rlau jơh, di tŭ ngan rlau jơh”. Geh vaccine lơi den cĭt vaccine hơ̆. Ală cau khoa học đơs ngan cồng nha bơh jơh ală bơta vaccine neh geh ai gơnoar.

Cau mblàng K’Hạnh