VOV4.K’ho- Ngai 19/5, Thủ tướng Chính phủ ồng Phạm Minh Chính neh geh dơ̆ lơh broă mờ Bộ Lao động, Thương binh mờ Xã hội. Đơs tàm dơ̆ lơh broă, Thủ tướng Phạm Minh Chính đơs nền jơnau sồr pal lam lơh gơtùi gùng dà bơtàu tơnguh lơh sa gơ jat bal mờ gơguh jak mờ ring bal mpồl bơtiàn, ờ “sang tĕ” bơta gơguh jak mờ ring bal mpồl bơtiàn nàng ntoat jat gơguh lơh sa ờs mờng, sền gròi rlau tai tus cau rƀah, cau ờ pràn tàm mpồl bơtiàn.

Thủ tướng kung đơs loh, Bộ gam geh ală mpồl broă ờ hềt lơh niam. Drà kă bro cau lơh broă bơtàu tơnguh ờ hềt ring bal, ờ hềt tam gơl pa, ờ hềt cèng bơta tơrgùm bal, ờ hềt geh bơta liên thông. Cồng nha lơh broă bơh Việt Nam dê gam lơyah, bơta do gơwèt tàm uă bơta mơya tàm hơ̆ geh kơnòl bơh Bộ dê, ngan là tàm broă bơto bơtê broă lơh tài kòn bơnus mờ bồ tơngoh bơsram sră, bồ tơngoh jak, pràn jak, bơta chài lơh broă là bơta lơh nền tàm broă tơnguh cồng nha lơh broă.

Thủ tướng sồr Bộ Lao động, Thương binh mờ Xã hội pơn jat tai lam lơh niam ală kơnòl broă, gơnoar broă geh jàu, tàm hơ̆ tơrgùm sền wơl broă lơh jat Nghị quyết sồ 42 bơh Chính phủ dê bè ală broă lơh dong kờl làng bol gơtìp kal ke tài bơh kòp Covid-19, ai tơlik ală broă lơh dipal ai tŭ tơngai tus in.

Cau mblàng K’Duẩn