VOV4.K’ho- Mho mang ngai 26/8, tơnơ̆ tŭ lòt sền broă lơh rơcăng sơndră kòp tàm ƀòn lơgar tơn, ồng Phạm Minh Chính- Thủ tướng Chính phủ, Kuang ătbồ Mpồl đơng lam dà lơgar rơcăng sơndră kòp Covid-19 lơh broă mờ ƀòn dờng Hồ Chí Minh bè broă tơnguh tai ơm yah ngài mpồl bơtiàn mờ ală broă lơh rơcăng sơndră kòp Covid-19 tàm ù tiah ƀòn dờng dê.

Lài hơ̆, bơh bồ ƀùi drim tus mho dùl ngai bal tơn, Kuang đơng lam bồ Chính phủ neh tus dùl ròt ală anih tàm ù tiah ƀòn dờng Hồ Chí Minh nàng sền swì broă lơh jăt jơnau sồr ơm yah ngài mpồl bơtiàn, ai tơl ală jơnau kờñ pal geh ngan rlau jơh ai rài kis làng bol in jăt nùs nhơm ờ gŏ di lời cau lơi ờ tơl piang sàu, àu soh, ai broă kham sơm kòp tus rềp mờ làng bol mhar ngan rlau jơh tàm xã, sơnah ƀòn, thị trấn tơn, sền gàr làng bol geh dờp mhar ngan rlau jơh, tàm jơh ală tŭ, tàm jơh ală tiah.

Đơs tàm dơ̆ lơh broă, ồng Phạm Minh Chính- Thủ tướng Chính phủ đơs loh, dơ̆ lòt lơh broă nàng kờñ sền swì bơh sơnrờp broă lam lơh jăt tơnguh tai ơm yah ngài mpồl bơtiàn mờ ală broă lơh rơcăng sơndră kòp Covid-19 tàm ù tiah ƀòn dờng kờp bơh ngai 23/8. Thủ tướng sồr ală kuang bàng cribơyai, sền swì ală broă lơh neh sồr lơh, dilah ală broă lơh do di, di ngan, di mờ bơta geh ngan, gơtùi lơh jăt ngan ngồn den pơn jăt tai lam lơh jăt pràn kơldang, bơtơl lơh sir rơhời ală broă gơlik geh tàm rài kis geh ngan.

Cau mblàng Lơ Mu K’Yến