VOV4.K’ho- Mho ngai 18/8, ồng Phạm Minh Chính- Thủ tướng Chính phủ neh geh dơ̆ lơh broă mờ Mpồl hòi jà làng bol dà lơgar.

Anih pơrjum tàm dơ̆ lơh broă

Ala mat Chính phủ, Thủ tướng ưn ngài Mpồl hòi jà làng bol dà lơgar, Mặt trận dà lơgar ală kấp, ală mpồl chính trị- mpồl bơtiàn  neh lơh ngan jơh nùs jơh tồr tàm tơngai pa do tàm broă lơh rcang sơndră kòp. Tàm dơ̆ sơndră kòp, Mpồl hòi jà làng bol dà lơgar, Mặt trận dà lơgar, ală mpồl chính trị- mpồl bơtiàn neh mut lơh bal jơh nùs ngan, lơh is, jat tàm nùs nhơm sền pràn kơl dang să jan, màng kis bơh làng bol dê là hơđang rlau jơh. Broă lơh hòi jà làng bol tàm anih lơh broă sră nggal dà lơgar dê mờ lơh jat bơta đơng lam bơh Đảng, Dà lơgar dê, pơgồp bơnah lơh geh bơta tam gơl pràn kơl dang, lơh ngan bè broă lơh hòi jà làng bol. Thủ tướng sồr, bol he neh lơh ngan den sơlơ lơh ngan rlau tai nàng ai dà lơgar rê wơl mờ bơta bè ờs pa, bơtàu tơnguh lơh sa- mpồl bơtiàn, pơgồp bơnah lơh jat geh cồng nha Nghị quyết Pơrjum dờng dơ̆ 13 bơh Đảng dê.

Cau mblàng K’Hạnh