VOV4.K’ho- Ngai 27/6, ồng Phạm Minh Chính- Thủ tướng Chính phủ neh lơh broă mờ Tỉnh ủy Đồng Nai bè broă lơh rơcăng sơndră kòp Covid-19 mờ broă lơh bơtàu tơnguh lơh sa- mpồl bơtiàn, sền gàr dà lơgar lơngăp lơngai 6 nhai bồ nam 2021, kơnòl broă mờ broă lơh tờm 6 nhai lồi nam do.

Tơnơ̆ tŭ iăt jơnau yal bơh càr Đồng Nai dê mờ ală jơnau đơs bơh ală Bộ, gah sơnah lơh broă dà lơgar dê, Thủ tướng jờng rơ ală cồng nha mờ càr Đồng Nai neh lơh geh, bơta kòp bơtờp sền bal geh gròi sền, broă lơh sa- mpồl bơtiàn geh kơ̆ kơl jăp, lơh jăt broă lơh sền gàr tơl niam rài kis mpồl bơtiàn niam. Thủ tướng đơs nền, Đồng Nai geh gơnoar broă kuơmàng ngan gơwèt mờ kơnhoàl ù tiah do mờ gùt lơgar, pal kràñ cê jơh nùs, kơ̆ dơn lơh jăt jơnau kờñ dơ̆ lĕ bal. Tŭ do, broă kòp bơtờp gơbàn kal ke, càr pal gĭt nền nùs nhơm rơcăng lài, rơcăng tam dră wơl mờ bơta gơbàn ờ niam ngan rlau jơh. Đồng Nai pal pơgồp bal niam mờ ală Bộ, gah sơnah lơh broă dà lơgar nàng bơsong ală broă gơrềng tus gùng dà broă lơh, mờ bơta gơkòl tàm bơtàu tơnguh lơh sa.

Cau mblàng Lơ Mu K’Yến