VOV4.K’ho - Tơnơ̆ mờ dơ̆ tus còp mờ lơh broă tơn pa do tàm ờ uă hìu lơh sơnơm vaccine, sinh phẩm lơh sơnơm drơng broă rơcang sơndră mờ kòp Covid-19, Thủ tướng ồng Phạm Minh Chính sồr, pal tơrgùm đơng lam, lam sồr, ai tơl bơta ƀuơn ngan di lah gơtùi, ai lài bơta pràn nàng chồl mhar broă kơlôi sơnơng, tam jào công nghệ nàng gờñ ngan di lah gơtùi ngui sơnơm vaccine lơh tàm lơgar, di tŭ drơng broă rơcang sơndră mờ kòp Covid-19.

Lơh ngan tàm nhai 6 nam 2022 di gơlan lơh geh sơnơm vaccine. Tàm broă kơlôi sơnơng pal nền nòn, ală Bộ, gah lơh broă, ală càr, ƀòn dờng gơrềng bal pal tơlĭk uă kơnòl, ai tơl bơta buơn, di tŭ bơsong kal ke ai broă tam jào, kơlôi sơnơng, lơh sơnơm vaccine. Thủ tướng jào Bộ Y tế đơng lam, pơgồp bal mờ ală Bộ, gah lơh broă gơrềng bal bơ̆t bơtàu rơndăp broă tam jào, kơlôi sơnơng, lơh geh dờp sơnơm vaccine, tàm hơ̆ geh sơnơm vaccine rơcang sơndră mờ kòp Covid-19 di jăt mờ broă lơh, kơrnoăt geh ai, di tơngai, ờ do ờ dă mờ kơlôi sơnơng nàng lơh sră nggal tơmù bè tơngai, jơnau yal ală cấp geh gơnoar in sền, tơlĭk kơrnoăt.

Cau mblàng Ndong Brawl