VOV4.K’ho - Di tàm dơ̆ tus còp mùl màl lơgar Tây, Thủ tướng Chính phủ ồng Phạm Minh Chính neh geh dơ̆ tìp măt ngoh rơngăc ngan mờ ala măt cau lơgar Việt Nam kis tàm châu Âu, geh bơyai lơh tàm hìu lơh broă Đại sứ quán lơgar Việt Nam tàm lơgar Tây.

Đơs tàm dơ̆ tìp măt, Thủ tướng pà git, ồng geh gŏ nùs nhơm niam ngan, ram ngan bơh làng bol neh tus bal dơ̆ tìp măt bơh tàm ală tiah ngài tàm bơta kòp gơtờp gam kal ke, mờ ală jơnau đơs pơgồp bal jơh nùs, geh kơnòl mờ ƀòn lơgar, dà lơgar dê. Thủ tướng đơs tờm, mpồl bơtiàn cau lơgar Việt Nam kis tàm lơgar bơdìh dờng pràn ngan mờ 5 tơlăk nă cau, geh broă lơh bal kuơ màng gơwèt mờ dà lơgar dê. Thủ tướng đơs, tàm tơngai tus, bơta geh Đảng, Dà lơgar kơ̆p kờñ ngan là làng bol lơgar Việt Nam kis tàm lơgar bơdìh pơn jăt tai tơnguh nùs nhơm tam klăc bal, ring bal, mờ đềt mềr bal mờ ală lơgar gam ơm kis, pơgồp bal tàm broă lơh jăt gùng dà, broă lơh bal mờ lơgar ndai krơi is, lơh tờm, uă bơta, uă gah broă lơh bal mờ lơgar ndai; rơcang lài, tus bal tơrgùm mờ dunia tơl ală bơta, jrô ơnàng; là bơyô, cau lơh broă bal pin dờn mờ là cau tàm mpồl bal niam, geh kơnòl tàm mpồl bơtiàn dunia.

Cau mblàng Ndong Brawl