VOV4.K’ho- Mho ngai 18/10, Thủ tướng Chính phủ ồng Phạm Minh Chính tìp măt mờ cau ala măt pơnrơ jak mpồl cau lơh sơnơm tàm tiah lam lài rơcăng sơndră mờ kòp Covid-19. Dơ̆ tìp măt geh bơyai lơh jăt broă lơh tìp măt tơn mờ tìp măt bơh tàm internet. Tus bal dơ̆ tìp măt geh rlau 19 rbô nă cau lơh sơnơm pơnrơ jak ngan tàm broă lơh rơcăng sơndră kòp Covid-19 bơh gah Lơh sơnơm, Mpồl ling, Kuang àng dê tàm jơh gùt lơgar. Tàm dơ̆ tìp măt, ală cau lơh sơnơm, kuang bàng lơh sơnơm neh yal bè ală jơnau kir sơnrai, nùs nhơm ngoh rơngăc tơnơ̆ ală nhai ngai kah yau pa do.

Uă jơnau yal pà gŏ bơta kơn jơ̆ kơn jŭt ngan ờ gơtùi yal jơh bơh ală cau să tờm tơn dê pal tam dră mờ kòp Covid-19. Đơs tàm dơ̆ tìp măt, Thủ tướng Chính phủ ồng Phạm Minh Chính đơs sùm, Đảng, Dà lơgar bal mờ làng bol gĭt ưn ngài ngan mờ đơs niam ngan mpồl cau lam lài tam dră mờ kòp mờ kuang bàng, cau lơh sơnơm, kơ̆p kờñ mpồl cau lơh sơnơm tàm tiah lam lài tam dră mờ kòp pơn jăt tai đòm jăt bơhiàn niam bơnĕ mờ ală cồng nha niam ngan, ală mờng chài kuơngan tàm tŭ tơngai lài, pơn jăt tai tă pơgồp dà kơlhề, jơh nùs ai broă lơh rơcăng sơndră kòp in kung bè broă lơh dong kờl sền gàr pràn kơldang să jan làng bol in.

Cau mblàng Lơ Mu K’Yến