VOV4.K’ho - Pơrjum broă lơh bal tài gơguh tơlir mờ jơnau kờñ gùt plai ù (P4G) 2030 geh bơyai lơh bơh ngai 30 tus 31 nhai 05 nam 2021 jăt broă lơh pờ tơlĭk tàm internet tềng đăp mờ broă đơng lam bơh Kuang atbồ lơgar Hàn Quốc ồng Moon Jae-in.

Thủ tướng Chính phủ ồng Phạm Minh Chính tus bal pơrjum cri bơyai dờng màng mờ gơnoar broă là kuang bàng tàm mpồl bơceh lơh bơh P4G dê. Broă lơh kuơ màng ngan bơh pơrjum là pơrjum cri bơyai dờng màng geh bơyai lơh tàm mang ngai 31 nhai 05 nam 2021 (jăt jơ lơgar Việt Nam) mờ broă tus bal pờ tàm internet bơh kuang bàng đơng lam dờng màng ală lơgar Hàn Quốc, Đan Mạch, Colombia, Chủ tịch Ủy ban châu Âu, lơgar Việt Nam, Hà Lan, Kenia, Costarica, Peru, Áo, Thái Lan, Campuchia, Kuang dong broă bè tam gơl trồ tiah bơh Kuang atbồ lơgar Mỹ mờ Kuang atbồ kes priă dunia (IMF). Tàm pơrjum, ală kuang đơng lam neh tơrgùm cri bơyai pe broă lơh jal mhar tàm tơngai tŭ do. Hơ̆ là tơnguh bơtàu wơl tơlir bơh kòp Covid-19, broă lơh ngan bơh mpồl bơtiàn dunia nàng geh jơnau kờñ di mơ carbon tus nam 2050 mờ tơnguh broă lơh tài trồ tiah mờ ai geh bơta ƀuơn broă lơh bal dà lơgar mờ cau dùl nă să lơh is.

Đơs tàm pơrjum cri bơyai dờng màng. Thủ tướng Chính phủ ồng Phạm Minh Chính đơs tờm tus mờ kòp gơtờp bal mờ ală kal ke, bơta tơlòng nàng ală lơgar gŏ loh làng rơlao tus mờ bơta kuơ màng bơh broă sền gàr tiah kis. Thủ tướng sồr rơlao mờ tŭ lơi jơh, mpồl bơtiàn dunia pal dùl nùs bal bơsong di pal bơh broă kờñ jal mhar tơnguh bơtàu wơl broă lơh sa mờ broă kờñ tơnguh bơtàu tơlir mờ tơnguh bơtàu kơl jăp rơlao tàm tơngai tơnơ̆ mờ kòp Covid-19.

Cau mblàng Ndong Brawl