VOV4.K’ho- Dờp jơnau jà bơh Thủ tướng lơgar Campuchia ồng  Samdech Techo Hun Sen, ngai 09/9/2021, Thủ tướng Chính phủ ồng Phạm Minh Chính neh tus bal mờ geh jơnau đơs kuơ màng tàm Pơrjum Kuang bàng kấp dờng màng Lơh broă bal Tiah dềt Mekong pờ ơnàng (GMS) dơ̆ 7, geh bơyai lơh jat broă lơh pờ tơlik tơn tàm internet.

Tus bal Pơrjum geh Thủ tướng ală lơgar Campuchia, Lào, Thái Lan, Lo, Việt Nam; Kuang bàng ala mat lơgar Myanmar, Chủ tịch Ngân hàng Bơtàu tơnguh châu Á (ADB); mờ mờr 350 nă Kuang bàng ala mat ală Bộ, gah sơnah lơh broă 6 lơgar, ală lơgar lơh broă bal bơtàu tơnguh mờ mpồl lơh sa kă bro tàm tiah do mờ bơdìh tiah do dê. Mờ tơngume “Lơh ngan kơ̆ kơljap bơta pràn nàng kong mờ ală bơta lòng bơh tŭ tơngai pa”, Pơrjum Kuang bàng kấp dờng màng Lơh broă bal Tiah dềt Mekong pờ ơnàng neh kờp sền bơta lơh broă bal bơh Pơrjum dơ̆ 6 geh bơyai lơh tàm nhai 3 nam 2018 mờ cribơyai gùng dà broă lơh  lơh broă bal tàm tŭ tơngai pa kung bè ală gùng dà broă lơh nàng sơr lèt gan tơngai uă kal ke bè tŭ do. Bè gùng dà broă lơh lơh broă bal tàm tơngai pa, Pơrjum ring bal “Broă rơndap lơh rcang sơndră kòp dờng Covid-19 mờ bơtàu tơnguh wơl bơh tơngai 2021-2023” mờ “Tơngume lơh broă jŏ jòng Broă lơh lơh broă bal lơh sa nam 2030”. Jat hơ̆, ală Kuang đơng lam bồ neh ai tơlik bơta wèt sền nam 2030 bè dùl tiah mut gơ rờm bal, pas gơs mờ bơtàu tơnguh kơ̆ kơljap mờ glòm jơh. Tơn jơh pơrjum, ală Kuang đơng lam bồ neh ring bal Jơnau yal bơr bal bơh dơ̆ pơrjum dê mờ ring bal bơyai lơh Pơrjum kuang bàng kấp dờng màng GMS dơ̆ 8 tàm lơgar Lo tàm nam 2024.

Cau mblàng K’Hạnh