VOV4.K’ho- Dờp jơnau jà bơh Thủ tướng lơgar Campuchia ồng Hun Sen dê, Thủ tướng Chính phủ ồng Phạm Minh Chính neh lam bồ Mpồl kuang bàng dờng màng lơgar Việt Nam tus bal Pơrjum kuang bàng kấp dờng màng Cribơyai lơh broă bal châu Á- châu Âu (ASEM) dơ̆ 13 geh lơh bơh ngai 25 tus ngai 26/11/2021 jat broă lơh pờ tơn tàm internet. Do là broă kuơmàng ngan rlau jơh bơh lơh broă bal ASEM dê tàm 3 nam do mờ geh lơh di tàm tŭ tơngkah kir sơnrai 25 nam Ngai crơng gơs Cribơyai lơh broă bal châu Á- châu Âu (1996- 2021).

Tus bal pơrjum nam do geh kuang đơng lam bồ dờng màng mờ ala mat bơh 53 lơgar geh jơng bơh ASEM dê. Mờ tơngume “Gàr kơ̆ rài lơh broă uă lơgar tài bơta gơguh bal”, ală kuang đơng lam bồ ASEM neh cribơyai bè ală broă lơh ngan bal mờ lơh broă bal uă lơgar tàm broă bơsong ală bơta lòng tiah do mờ gùt plai ù, sơndră mờ kòp dờng Covid-19, chồl pràn bơtàu tơnguh wơl mờ gơguh lơh sa kơ̆ kơljap, tơrgùm jơh ală bơta mờ sơlơ tơnguh rlau tai bơta tàm tơrbŏ bal mpồl bơtiàn mờ niam chài. Ală kuang đơng lam bồ kung tam pà nùs nhơm bè broă chính trị, lơh sa mpồl bơtiàn tàm 2 tiah châu Á mờ châu Âu mờ cribơyai bè ală gùng dà, broă lơh kờñ tơnguh rlau tai lơh broă bal ASEM.

Cau mblàng K’Duẩn