VOV4.K’ho - Đơs tàm pơrjum rài tơnơ̆ do châu Á geh Nikkei bơyai lơh tàm ngai 20 nhai 5 nam 2021 jăt broă lơh pờ tơlĭk tàm internet, Thủ tướng ồng Phạm Minh Chính đơs tờm, dùl châu Á brồ guh tài bơta ring lơngai ring niam tơnguh bơtàu mờ pas gơs là nùs nhơm kơ̆p kờñ bal bơh ală lơgar tàm tiah do dê, ring bal bơh ală lơgar, lơh ngan bơh ală Chính phủ, broă tus bal là bơta tờm nàng bơ̆t bơtàu dùl rài tơnơ̆ do niam bơnĕ ai châu Á in.

Geh lam lơh tàm nam 1995, pơrjum dunia bè rài tơnơ̆ do châu Á là dùl tàm ală pơrjum pah nam geh pin dờn ngan tàm châu Á geh Tập đoàn Nikkei (lơgar Nhờk) đơng lam bơyai lơh. Pơrjum hòi jà broă sền gròi mờ tus bal bơh kuang đơng lam dờng màng, cau năc, cau jăk chài, mpồl lơh sa kă bro ală lơgar tàm châu Á kung bè ala măt ală tập đoàn lơh sa dờng tàm dunia.

Tàm pơrjum, ală kuang bàng cri bơyai nền nòn bè ală broă tàm tiah do; gơnoar mờ bơta geh bơh châu Á tàm pang rùp bal bơh dunia mờ ală broă tơnguh uă bơngă bơh tiah do dê mờ tơngu me: “Ai geh rơnàng tơnơ̆ mờ Covid: Gơnoar bơh châu Á gơwèt mờ broă brồ guh gùt plai ù”.

Đơs tàm pơrjum, Thủ tướng ồng Phạm Minh Chính đơs, lơgar Việt Nam tus bal geh kơnòl rơcang bal mờ ală lơgar bơ̆t bơtàu bơta ring lơngai mờ nùs nhơm tam klăc bal tài bơta kuơ bal, bơta tơnguh bơtàu pas gơs bơh tơl lơgar tàm tiah do tài bơta hờm ram mờ gơboh gơbài bơh ală làng bol tàm dunia.

Cau mblàng Ndong Brawl